CANTARES 3

1Ch'isisnin puñunaypi puñushaspa, munakusqayta mask'arqani, nitaj tarikaporqanichu. 2Chantá sonqoypi nerqani: Kunampacha jatarikuspa, tukuynin llajtata mask'amusaj; tukuy callesnejta, plazasnejta munakusqayta mask'akampusaj, nispa. Mask'amuspapis, mana tarikamporqanichu. 3Llajtata qhawaspa muyoj soldados taripawajtinku, paykunata tapurikorqani: Manachu munakusqayta rikorqankichej? nispa. 4Paykunamanta uj chhikanta karunchakuytawantaj, munasqaywan tinkukorqanipacha. Makinmanta jap'iykuspataj, manaña payta kacharerqanichu, mamaypa wasinman pusaykunaykama, maypichus paqarikorqani, chayman. 5Jerusalenmanta sipaskuna, jurawaychej campopi tarukasrayku, uña tarukasrayku ima: Munasqayta ama rijch'arichipuwaychejchu. Saqepuwaychej puñukojta, payllamanta rijch'arinankama. 6Imataj chayri? Ch'in pampamanta q'oshñi jina rikhurimushan chay, mirrawan, inciensowan, tukuy ima sumaj q'apaykunawan q'aparishajri? 7Chayqa Salomonta wantuspa apananku tiyanan. Payqa jamushan sojta chunka sumaj wapu Israelpa soldadosnimpa chawpillankuta. 8Tukuyninku espadasniyoj kanku, sapa ujninkutaj sumajta maqanakuyta yachanku. Sapa ujninku espadasninkutaqa chumpinkuman sat'ikunku, ch'isisnin imapis kachun wakichisqa kanankupaj. 9Rey Salomonqa uj wantunata paypaj ruwachikorqa, Libanomanta sumaj kaj maderawan. 10Chay wantunaj sayantasnenqa qolqe metalmanta kanku, wasan atikunantaj qorimanta. Tiyananqa puka telamanta sumaj sirasqa karqa. Chay ukhuntataj Jerusalenmanta sipaskunaqa munakuywan ruwasqa imaswan k'achancharqanku. 11Sión llajtamanta sipaskuna, llojsimuychej Rey Salomonta qhawarej. Umampi kashan k'acha pilloqa, mayqenwanchus casarakushajtin maman pillucherqa, chay, mayta kusikusharqa, chay p'unchaypi.

will be added

X\