1 Noqaqa Sarón vallemanta rosa t'ika kani, pampasmanta lirio t'ika. 2 Imaynachus khishkas chawpipi lirio t'ika kashan, ajinallataj munasqetaypis sipaskunaj chawpinkupi kashan. 3 Imaynachus sach'aspa chawpinkupi manzana sach'a kashan, ajinallataj munasqaypis wayna runaspa chawpinkupi kashan. Chay sach'aj llanthumpi noqaqa ima munayta tiyarikuni, poqoynintaj noqapajqa sumaj misk'i. 4 Maypichus jatun mikhuykunata mikhunku, chayman pusawan, pataypitaj wiphalanqa munakuymin. 5 Uvas k'isasta mikhuchiwaspa, kallpachawaychej; manzanastapis mikhuchiwaychej, imaraykuchus munakunawanmanta wañushaniña. 6 Lloq'e makin kunkay urapi kachun, paña makinwantaj ojllaykuriwachun. 7 Jerusalenmanta sipaskuna, jurawaychej, pampaspi tarukasrayku, uña tarukasrayku ima: Munakusqaytaqa ama rijch'arichipuwaychejchu. Saqepuwaychej puñukojta, payllamanta rijch'arinankama. 8 Munasqayqa jamushanña; parlasqanta uyarishaniña. Payqa orqo patasta, loma patasta phinkirispa jamushan. 9 Munakusqayqa uj taruka jina, juch'uy tarukita jina. Kay perqa wasapiña kashan. Ventanaman qayllaykuspa, qhawamushan, rejillasninmantataj wateqamushan. 10 Munakusqayqa kay jinata niwarqa: Sayariy, munakusqáy, jampuwaytaj; jaku, chunkitúy. 11 Qhawariy, chiri tiempoqa ripunña; para tiempopis ripullantaj. 12 T'ikaspis campospi p'utumushankuña; takirikuna tiempoqa chayamunña. Kay llajtanchejpeqa jurk'utitaspa waqasqankupis uyarikunña. 13 Higo sach'aj poqoynin rikhurimushanña; uva sach'aspis t'ikarispa q'aparimushanña. Sayariy, munakusqáy, jampuwaytaj, chunkitúy. 14 Palomitáy, qanqa chhanka jusk'uspi pakakunki, millay manchachikuna chhanka jusk'uspi. Uyaykita rikurichikuway ari; parlapayarimuway ari. Qampa parlasqaykeqa sonqoyta t'ikarichiwan, uyaykitaj may k'achitu. 15 Atojkunata jap'iraychej, chay uña atojkunata, uvas huertasta pierdechejkunata, imaraykuchus uvas huertasninchejqa t'ikapiña kashanku. 16 Noqaj munasqayqa noqajta, noqapis paypata kani. Payqa lirio t'ikas ukhupi ovejasninta michin. 17 P'unchay kashajtin, manaraj ch'isiyaykushajtin, kutimuypuni ari, munakusqáy; qanqa taruka jina kay, uña taruka jina Beter orqospi.
