ROMANOS 6

1Kunan ima nisuntaj? Juchallillasumpunichu Diospa qhasilla k'acha yanapaynin astawan ashkhayanampaj? 2Ni imarayku. Juchapajqa wañorqanchejña. Imaynatataj juchallapipuni kawsasunri? 3Chayrí, manachu yachankichej Cristo Jesuspi tukuy bautizasqa kajkunaqa wañuynimpi bautizasqa kasqanchejta? 4Bautismonejta Cristowan khuska wañuypi p'ampasqa karqanchej, imaynatachus Cristopis wañusqamanta kawsarimporqa Dios Tataj atiyninwan, ajinallatataj noqanchejpis mosoj kawsaypi kawsananchejpaj. 5Sichus Cristoj wañuynimpi Paywan khuskachasqa kanchej chayqa, ajinallataj kasunchej kawsarimpuynimpipis. 6Yachanchej mawk'a runanchejqa Cristowan khuska chakatasqa kasqanta, juchallikoj aychanchej amaña atiyniyoj kanampaj, amaña astawan juchata kasunanchejpaj. 7Pichus wañojqa juchamanta kacharisqaña. 8Cristowanchus wañunchej chayqa, creenchej paywan khuska kawsanallanchejtataj. 9Yachanchej Cristoqa wañusqamanta kawsarimpuspa, manaña wañunanta. Wañoyqa Paypaj manaña atiyniyojchu. 10Juchapaj wañuspaqa, uj kutillata wañorqa wiñaypaj, kawsaspataj Diosllapaj kawsan. 11Ajinallatataj qankunapis yachaychej juchapaj wañusqa kasqaykichejta, Diospajtaj kawsasqaykichejta Cristo Jesús Señorninchejpi. 12Chayrayku amaña saqeychejchu juchata wañoj cuerpoykichejpi munayninta ruwajta, chayta kasunaykichejpaj. 13Amallataj cuerpoykichejta juchaman jaywaychejchu chaynejta sajra imasta ruwanapajqa. Astawanqa qankunaqa wañusqasmanta kawsarimusqa jina cuerpoykichejta Diosman jaywaychej, chaynejta cheqan kajta ruwanapaj. 14Chayrayku juchataqa amaña saqeychejchu qankunapi munayninta ruwajta, imaraykuchus manaña leypa kamachiynimpichu kankichej, astawanqa Diospa qhasilla k'acha yanapaynimpi kankichej. 15Chantaqa, juchallikusunchu mana leypa kamachiynimpi kaspa, Diospa qhasilla k'acha yanapaynimpi kasqanchejrayku? Ni imarayku. 16Manachu yachankichej wata runa jina yaykuspa, chay patrompa kamachisqanta kasunapuni kasqanta? Ajinaqa chay patrompa wata runasnin kankichej. Ajina ari, munaspaqa atinkichej juchata kasuyta, chaytaj wañuyman pusasonqachej. Manachayrí atinkichej Diosta kasuyta, chaytaj cheqan kayman pusasonqachej. 17Ñawpajta juchaj wata runasnin karqankichej. Kunantajrí, gracias Diosman kachun, imaraykuchus tukuy sonqowan kasunkichejña chay cheqa yachachiyta, mayqentachus kasunaykichejpaj churasqa kankichej, chayta. 18Juchamanta kacharichisqa kaspataj, cheqan kajpa kamachisninman tukunkichej. 19Mayqen runa jinalla parlashani, qankuna pisi yachayniyojlla kasqaykichejrayku. Qankunaqa ñawpajta cuerpoykichejta jaywaj kankichej millay kajman, sajra kajmampis. Kunanrí Diospaj t'aqasqa kanaykichejpaj, cuerpoykichejta Diosman jaywaychej, cheqan kajta kasunaykichejpaj. 20Juchaj wata runasnin kashaspaqa, mana cheqan kajta ruwanaykichejpaj jinachu karqankichej. 21Chantá, chay imasta ruwaspa, imatataj tarerqankichej, mayqenkunamantachus kunan p'enqakushankichej, chaykunamanta? Chay ruwaykunaqa wañuyman pusan. 22Juchamanta kacharichisqa kaspaqa, Diospa kamachisninmanña tukupunkichej. Jinaqa wiñay kawsayniyoj jina Diospaj t'aqasqa kawsakuychej. 23Juchaj pagonqa wañuymin; Diospa regalonrí wiñay kawsay Cristo Jesús Señorninchejpi.

will be added

X\