ROMANOS 3

1Imapitaj aswan walej judío kayri, chayrí ima yanapataj kasqa circuncidasqa kayri? 2Tukuy imapi aswan walej. Ñawpajtaqa Diospa Simi Nisqanqa judiosman qosqa karqa. 3Sichus paykunamanta wakin mana creerqanku chayqa, imanantajri? Paykuna mana creesqankuraykuchu Diosqa nisqanta mana junt'anqa? 4Chayqa mana jinachu; astawampis Diosqa cheqamin, tukuy runaspis llulla kachunku. Diosmanta Qhelqasqapi nin: Nisqasniykinejta cheqampaj qhawasqa kanayki tiyan, juzgasojtinkutaj, atipanki, nispa. 5Sichus sajra kayninchej Diospa cheqan kayninta sut'ita rikuchin chayqa, ima nisuntaj? Nisunmanchu Diosqa jasut'ispa juchayoj kasqanta? Chaytaqa parlani runa jinalla. 6Chayqa mana jinachu; ajina kanman chayqa, Dios imaynatataj kay pacha runasta juzganman? 7Sitajchus llullakusqayrayku Diospa cheqa kaynin allinnimpaj wiñan chayqa, imaraykutaj juchayojpis kayman jina juchachasqa kaniri? 8Imaraykutaj mana nisunmanchu: Sajra kajta ruwana, allin kaj jamunampaj, nispa? Wakin tumpawayku noqayku chayta nisqaykuta. Paykuna jasut'isqa kanankoqa cheqapuni. 9Imaynataj chantari? Noqanchej judiosqa mana judío kajkunamanta aswan allinchu kanchej? Chayqa mana jinachu. Ña ninchejña judiosta, mana judío kajkunatapis tukuyninku juchapi kasqankuta. 10Diosmanta Qhelqasqapi nin: Ni ujpis mana juchayojqa kanchu. 11Entiendejqa mana pipis kanchu; Diosta mask'ajpis manallataj kanchu. 12Tukuyninku cheqan ñanmanta pantaykunku, jinataj mana kajman tukunku. Mana pipis allin kajta ruwajqa kanchu, ni ujllapis. 13Tonqorinkoqa kicharisqa covacha jina. Nisqankuwan ch'awkiyanku, parlasqankutaj katari veneno jina. 14Siminkoqa junt'a kashan maldicionwan, jaya parlaywan ima. 15Usqhayta rinku runata wañuchinankupaj. 16Maypichus purisqankupeqa allin kawsay mana kanchu, astawampis ñak'ariylla. 17Sonqo tiyaykuy ñantaqa mana rejsinkuchu. 18Diosta manchachikoyqa ni yuyayninkupi kanchu. 19Yachanchej leypa nisqanqa leypi kajkunapaj churasqa kasqanta, kay pachapi kaj chhika runas ch'inyachisqa kanankupaj, tukuy runas Diospa ñawpaqempi juchachasqa rikhurinankupaj. 20Leypa kamachisqasninta ruwasqanrayku, mana pipis Diospa ñawpaqempi cheqan runapaj qhawasqachu kanqa, manachayqa leynejta juchayoj kasqanchejta reparakunchej. 21Kunanrí, Diosqa rikuchin imaynatachus runata cheqan runapaj qhawasqanta mana leyllawan. Chaymantataj leypis, profetaspis testigo jina willanku. 22Diosqa runasta cheqampaj qhawan creeynejta Jesucristopi. Payqa chayta ruwan Jesuspi tukuy creejkunapaj, imaraykuchus tukuy uj rejlla kanku. 23Tukuy runas juchallikusqankurayku, paykunaqa Diospa jatun kaynimpa k'anchayninta mana taripayta atinkuchu. 24Jinaqa Diospa qhasilla k'acha yanapayninrayku runasqa cheqan runaspaj qhawasqa kanku, Cristo Jesusnejta juchamanta kacharichisqa kasqankurayku. 25Jesusta Dios Tata churarqa wañuyninwan runasta allinyachinampaj, yawarnimpi creeynejta. Ajinapi justicianta rikucherqa, pacienciawan tukuy ñawpa juchasta mana jasut'ispa. 26Chayta ruwarqa kay p'unchaykunapi justicianta rikuchinampaj, Jesuspi creejta cheqan runapaj qhawanampaj. 27Chayrayku kunanqa maypitaj kashan runaj jatunchakuyninri? Chayqa wijch'usqaña. Imarayku? Leyta junt'asqanraykuchu? Mana. Astawanqa creesqanrayku. 28Ajinapi yachanchej creeynejta runaqa cheqan runapaj qhawasqa kasqanta, manataj leyta junt'asqanraykuchu. 29Diosqa judiospa Diosnillanchu? Manachu mana judío kajkunajpatapis Diosnillantaj? Cheqamanta paykunajtapis Diosnillantaj. 30Diosqa ujlla, Paytaj creesqankunejta circuncidasqastapis, mana circuncidasqastapis cheqan runapaj qhawanqa. 31Chantá, creeyrayku leyta manakajman tukuchinchejchu? Ni imarayku; astawanqa leyta aswan sinch'itaraj sayachinchej.

will be added

X\