ROMANOS 15

1Creeypi kallpayojkunaqa pisi kallpayojkunata yanapana ñawpajman rinallankupajpuni; ama noqallanchejpajchu allin kayta mask'ana. 2Sapa ujninchej runa masinchejta kusichina, imatapis paypa allinnimpaj ruwaspa, ajinamanta creeypi wiñachisqa kanampaj. 3Cristopis mana Paypa allinnillantachu mask'arqa. Diosmanta Qhelqasqapi nin: Chejnisojkunaj toreyasusqankupis Noqaman chayawan, nispa. 4Ñawpajta qhelqasqa kajqa yachachinawanchejpaj qhelqasqa karqa, Diosmanta Qhelqasqapi pacienciakuspa, sonqochakuspataj suyakuyniyoj kananchejpaj. 5Pacienciata, sonqochakuytawan qoj Dios uj yuyayllata qankunaman qochun Cristo Jesusman jina. 6Ajinamanta tukuyniykichej uj sonqolla, uj simillataj Señorninchej Jesucristoj Tatan Diosta yupaychaspa, jatunchankichej. 7Ujkuna ujkunata k'achata jap'iychej, imaynatachus Cristopis jap'ikapuwarqanchej, ajinata, Dios jatunchasqa kanampaj. 8Kayta niykichej: Cristoqa jamorqa judiosta sirvej, Diospa cheqa kayninta rikuchinampaj, chantaqa ñawpa tatasman imatachus Dios nerqa qonanta, chayta junt'anampaj. 9Jinallataj jamorqa mana judío kajkuna Diosta yupaychanankupaj khuyakuyninrayku. Diosmanta Qhelqasqapi nin: Chayrayku mana judío kajkuna ukhupi yupaychasqayki, takisajtaj sutiykiman, nispa. 10Ujtawan nillantaj: Mana judío kajkuna, kusikuychej Diospa ayllunwan khuska, nispa. 11Ujtawampis nillantaj: Tukuy mana judío kajkuna, Señorta yupaychaychej, sutintataj jatunchaychej tukuy naciones, nispa. 12Isaiaspis nillantaj: Isaípa saphinmanta uj kamachej rikhurenqa. Payqa sayarenqa mana judío kajkunata kamachinampaj, paykunataj Paypi suyakonqanku, nispa. 13Suyakuyta qoj Dios tukuy kusiywan, sonqo tiyaykuywan creesqaykichejrayku qankunata junt'achichun, Espíritu Santoj atiyninwan Diospi mayta suyakunaykichejpaj. 14Hermanosníy, noqa allinta yachani qankuna k'acha kaywan, tukuy yachaywan junt'a kasqaykichejta, qankunapura yuyaychanakunaykichejpaj. 15Chayrayku hermanos, mana manchachikuspa qhelqamuykichej qankunata yuyarichinaypaj chay tukuy yachasqaykichejtaña, Diosqa kay ruwanata junt'anaypaj atiyta qowasqanmanta. 16Jesucristoj kamachin kani, sacerdote jina sirvispa Diospa evangelionta mana judío kajkunaman willaranaypaj, paykuna sumaj jaywana jina Diospaj t'aqasqa kanankupaj Espíritu Santonejta. 17Ajinaqa tiyapuwan ari, Cristo Jesuspi imamantachus jatunchakunay Diosta sirvisqaymanta. 18Noqaqa sut'ita nisaj, imatachus Cristo noqanejta ruwasqanta, chayllata. Cristoqa parlasqaywan, ruwasqaywantaj mana judío kajkunata Diosman pusan Payta kasunankupaj. 19Milagroswan, señaleswan ima Espíritu Santoj atiynimpi Cristoj evangelionta junt'achini Jerusalenmanta, tukuynejman Ilíricoj muyuyninkama. 20Chay jinamanta maytapuni munarqani evangeliota willarayta, maypichus Cristomanta manaraj uyarinkuchu, chaypi, ama wajpa willayta qallarisqanman yaykunaypaj. 21Diosmanta Qhelqasqapi nin: Pikunamanchus manaraj Paymanta willarqankuchu, chaykunaqa Payta rikonqanku. Mana jayk'aj Paymanta uyarejkunataj entiendenqanku, nispa. 22Chayrayku sapa kuti munani qankunata watukoj jamuyta, manataj atinichu. 23Kunanqa kay llajtaspi willayta tukusqayrayku, ñawpaj watasmantapachataj qankunata watukuyta munasqayrayku, 24Españaman rej jina qankunata watukuyta yuyani. Jaqayman rishaspa, qankunata rikuyta munani, qankunawan kusikuytawantaj, munayman qankuna yanapanawaykichejta Españaman chayanaypaj. 25Kunanrí Jerusalenmanraj rishani jaqaypi kaj hermanosman yanapata apaspa. 26Macedoniapi, Acayapiwan kaj hermanos qolqeta tantarqanku, Jerusalenpi creejkuna ukhupi wajcha hermanosta yanapanapaj. 27Ni pej nisqallan tukuy sonqo chayta ruwarqanku, imaraykuchus mana judío kajkunamanta creejkuna manu kanku judiosman. Sichus mana judío kajkuna Diospa bendicionesninta judiosnejta jap'erqanku chayqa, paykunapis kay pachapi kapuyninkuwan creejkuna judiosta yanapananku. 28Ajinaqa kay qolqeta creejkuna judiosman jaywapuytawan, Españaman rej jina watukusqaykichej. 29Yachani qankunata watukoj jamuspa, Cristoj evangeliompa bendicionesninwan junt'a chayamunayta. 30Hermanos, mañakuykichej Señorninchej Jesucristonejta, Espíritu Santoj munakuynimpi ima, Diosmanta mañapunawaykichejta, noqawan khuska kallpakuspa, 31Judeapi mana creejkunamanta Dios waqaychanawanta. Mañapullawaychejtaj, kay apashani, chay qolqe Jerusalenpi creejkunapaj allin kanampaj. 32Ajina kajtin, Diospa munayninman jina kusisqa chayamuspa, qankunawan khuska samarikusaj. 33Sonqo tiyaykuyta qoj Dios qankunawan kachun. Ajina kachun.

will be added

X\