ROMANOS 14

1Creeypi pisi kallpayojtaqa ama qhesachaychejchu, nitaj imatachus yuyasqanmantaqa siminakuspa churanakuychejchu. 2Uj runaqa yuyan tukuy imata mikhuyta atisqallanta; wajrí, creeypi pisi kallpayoj kaspa, yuyan q'omerkunallata mikhunan kasqanta. 3Tukuy imata mikhojqa ama juzgachunchu mana tukuy imata mikhojtaqa. Mana mikhojpis amallataj juzgachunchu chayta mikhojtaqa, imaraykuchus Diosqa chay runata mana qhesachanchu. 4Qanrí, pitaj kanki wajpa kamachinta juzganaykipaj? Chay runaqa patronnillampaj sayasqapis kashan, chayrí urmasqapis. Ajinapis payqa sinch'ita sayanqa, imaraykuchus Señorqa atiyniyoj sinch'ita sayachinampaj. 5Uj runaqa nin p'unchaykunaqa mana kikin kikinchu kasqankuta. Waj runataj nin tukuy p'unchaykunaqa uj rejlla kasqankuta. Ajinaqa sapa uj allinta yachachun imaraykuchus chay jinata creesqanta. 6Pichus uj p'unchayta waqaychajqa Señorta jatunchanampaj waqaychan. Pichus tukuy imata mikhojpis Señorta jatunchanampaj mikhun, imaraykuchus Diosman graciasta qon. Chantá, pichus wakin imasllata mikhojpis mana mikhunchu Señorta jatunchayta munaspa, astawanqa paypis Diosman graciasta qollantaj. 7Noqanchejmanta mana pipis pay kikimpajchu kawsan, nitaj pipis pay kikimpajchu wañun. 8Chayrayku kawsaspaqa, Señorpaj kawsanchej. Wañuspapis, Señorpaj wañunchej. Ajina ari, kawsaspapis, wañuspapis Señorpata kanchej. 9Cristoqa kaypaj wañorqa, kawsarimporqataj, wañusqaspata, kawsajkunajtawan Señorninku kanampaj. 10Qanrí, imaraykutaj hermanoykita juzganki? Chayrí, imaraykutaj hermanoykita pisipaj qhawanki? Imaraykuchus tukuyninchej Diospa juzganampa ñawpaqempi rikhurinanchej tiyan Pay juzganawanchejpaj. 11Diosmanta Qhelqasqapi nin: Señorqa nin: Kawsayniyrayku jurani: Tukuy runas ñawpaqeypi qonqorikonqanku, tukuy simitaj Diospuni kasqayta rimarenqanku, nispa. 12Ajinaqa sapa ujninchej ruwasqasninchejmanta Diosman cuentata qonanchej kanqa. 13Chayrayku amaña ujkuna ujkunata juzganakunachu, astawanqa sonqomanta churakuychej ama hermanota misk'achinapaj, nitaj juchaman urmachinapaj. 14Señor Jesuspi kaspa, noqa yachani mana ima mikhunapis payllamantaqa runata juchawan ch'ichichasqanta. Astawanqa pichus yuyan imallapis ch'ichichaj kasqanta, paypajqa ch'ichipuni. 15Sichus mikhusqaykirayku hermanoyki llakikun chayqa, manaña munakuyman jinachu ruwashanki. Ama chay mikhusqaykiwan hermanoykita urmachiychu, imaraykuchus payrayku Cristo wañorqa. 16Ama ari qankunapaj imachus allin kajmantaqa sajrata parlachiychejchu. 17Diospa reinonmanta parlaspaqa, mana mikhunamantachu nitaj ujyanamantachu parlashanchej, manachayqa cheqan kaymanta, sonqo tiyaykuymanta, Espíritu Santopi kusiymantawan. 18Sichus pipis ajinata ruwaspa Cristota sirvin chayqa, Diosta kusichin, runastaj chaytaqa allimpaj qhawanku. 19Ajinaqa, imachus allin kawsayman pusajta qhatina, purajmanta kallpachanakuspa. 20Diospa ruwasqanta ama urmachiychu mikhunasrayku. Cheqamanta ima mikhunapis allin; chaywampis mana allinchu, runaqa wajkunata misk'achinan imatachus mikhusqanwan. 21Sichus aychata mikhusqayki, chayrí vinota ujyasqaykipis hermanoykita misk'achispa urmachin chayqa, allin kanman imachus hermanoykita urmachejtaqa mana ruwanayki. 22Tiyanchu creeyniyki? Chay creeyniykipi sinch'i kay Diospa ñawpaqempi. Kusikuyniyojmin pitachus sonqon mana juchachanchu allin kasqanta yuyaspa ruwasqasninmanta. 23Chantá, sichus pipis imatapis iskay sonqolla mikhun chayqa, juchachasqaña, mana tukuy sonqo creesqanman jina ruwasqanrayku. Tukuy imata iskay sonqolla mana creeyman jina ruwayqa jucha.

will be added

X\