ROMANOS 13

1Tukuy runas kamachejkunata kasuchunku, imaraykuchus kamachina ateyqa Diosllamanta jamun, kamachejkunapis Diospa churasqallantaj kanku. 2Ajinaqa, sichus pipis kamachejkunata mana kasun chayqa, Diospa churasqanta mana kasunchu. Chayrayku mana kasukojkunaqa paykuna kikinkupaj jasut'iyta mask'akunku. 3Kamachejkunaqa allin kajta ruwajkunata mana manchachinankupajchu churasqa kanku, manachayqa sajrata ruwajkunallata. Munankichu mana mancha manchalla kamachejpa ñawpaqempi kawsayta? Allinta ruway, paytaj allimpaj qhawasonqa. 4Kamachejqa Diospa kamachisqanta ruwan qampa allinniykipaj. Chantá manachus allinta ruwanki chayrí, manchachikuy, imaraykuchus kamachejqa mana qhasipajchu churasqa. Payqa Diospa kamachinmin, sajrata ruwajta jasut'inampaj. 5Chayrayku paykunata kasunaqa allimpuni, mana jasut'ita manchachikuspallachu, astawanqa sonqonchej allin kasqanta willawasqanchejrayku. 6Chayrayku impuestotapis pagankichej, imaraykuchus kamachejkunaqa Diospa kamachisnin kanku, kay tukuy imasta ruwanallankupajpuni. 7Tukuy manuykichejta junt'aychej: Pimanchus impuesto pagana kajtenqa, chay impuestota pagaychej. Waj ima pagana kajtimpis, chaytapis pagaychej. Pitachus kasunaykichej tiyan, chaytaqa kasuychej. Pitachus jatumpaj qhawanaykichejtapis jatumpaj qhawaychej. 8Ajinaqa ama pimampis manuchu kaychej, manachayqa purajmanta munanakuychej, imaraykuchus runa masinta munakojqa ñapis leyta junt'anña. 9Leyqa jinata nin: Ama khuchichakuspa qhenchachakunkichu; ama runata wañuchinkichu; ama suwakunkichu; ama wajpa kapuyninta munapayankichu, nispa. Mayqen kamachillapis kay nisqapi junt'akun: Runa masiykita munakunki qan kikiykita jina. 10Munakuyniyojqa mana ima sajratapis runa masimpa contranta ruwanchu. Chayrayku runa masinta munakojqa leypa nisqanta junt'an. 11Chay imasta ruwaychej, tiempota allinta reparaspa. Yachanchej puñuymanta rijch'arina horaña kasqanta, imaraykuchus salvacionninchejqa aswan qayllapi kashan, creesqanchej, chay p'unchaymantaqa. 12Tutaqa tukukapushanña, p'unchaytaj qayllamushan. Chayrayku amaña ruwanachu laqhayaypa ruwanasninta, astawanqa Diospa k'anchaynimpa maqanakuna armasta oqharikuna. 13P'unchaypi purina jinata purinachej, maychus kajta ruwaspa, amataj purinachu imaymana millay machaykunapi, imaymana millay kawsaypi, churanakuypi, nitaj envidianakuypipis. 14Astawanqa Señor Jesucristowan p'achawan jina p'achallikuychej, amataj yuyaychejchu aychaj sajra munayninta sajsachiyta.

will be added

X\