1 Ajinaqa hermanos, Diospa khuyakuyninrayku mañakuykichej cuerpoykichejta Diosman jaywanaykichejta kawsashaj jaywanata jina Diospaj t'aqasqata, Diosta kusichejta ima. Chaymá kashan cheqan sonqowan Diosta yupaychayniykichejqa. 2 Ama kay pacha runaspa yuyasqankuman jina kawsayman yachakuychejchu; astawampis sonqoykichejpi, yuyayniykichejpi ima mosojyachisqa kaychej. Ajinapi yachankichej imaynachus Diospa munaynin kasqanta k'acha, Diosta kusichej, junt'asqataj. 3 Dios k'acha kaynimpi kay ruwanata qowasqanrayku, sapa ujniykichejman niykichej: Ama qankuna kikiykichejmanta aswan sumaj kasqaykichejta yuyakuychejchu; manachayqa sapa uj pay kikinmanta maychus kasqallanta yuyakuchun, Dios sapa ujman creeyta qosqanman jina. 4 Cuerponchejpeqa ashkha imasnin tiyan, manataj tukuyninkuchu uj rejllata ruwanku. 5 Ajinallataj noqanchejpis ashkha kaspapis, Cristopi uj cuerpolla kanchej, sapa ujtaj ujkuna ujkunawan cuerpoj imasnin jina kanchej. 6 Ajinaqa, sapa ujman ruwanapaj uj atiyta qhasilla k'acha yanapayninman jina qowarqanchej. Chayrayku sichus pimampis Diospa nisqanta willanapaj atiyta qorqa chayqa, creesqanman jina willachun. 7 Sichus pimampis yanapanapaj atiyta qon chayqa, allinta yanapachun; chayrí sichus pimampis yachachinapaj atiyta qon chayqa, yachachichun. 8 Sichus pimampis sonqota pataman oqharinapaj atiyta qon chayqa, chayta ruwachun. Sichus pimampis kapuyninmanta jaywarinapaj atiyta qon chayqa, chaytaqa ruwachun mana mich'akuspa. Sichus pimampis kamachinapaj atiyta qon chayqa, allin sonqowan kamachichun. Sichus pimampis khuyanapaj atiyta qon chayqa, kusiywan khuyachun. 9 Munakoyqa tukuy sonqo kachun, ama simillamantachu. Sajra kajta chejniychej, allin kajmantaj k'askaychej. 10 Hermanos jina tukuy sonqo munanakuychej, ujkuna ujkunata aswan allimpaj qhawaspa. 11 Ima ruwanallapipis ama qhellas kaychejchu; k'uchis kaychej, tukuy sonqotaj Señorta sirviychej. 12 Diospi suyakuspa, kusikuychej; ñak'ariypi sinch'ita sayaychej; mana sayk'uspa Diosmanta mañakuychejpuni. 13 Diospa ajllasqasnin pisichikojtinku, paykunata yanapaychej; wasiykichejman paykunata tukuy sonqo wajyarikuyta yachaychej. 14 Bendeciychej qankunata waqachejkunata; Diosmanta paykunapaj mañapuychej, amataj maldeciychejchu. 15 Kusikuychej kusikojkunawan, waqajkunawantaj waqaychej. 16 Qankuna ukhupeqa uj sonqolla kaychej. Ama jatunchakuychejchu, manachayqa pisipaj qhawasqa kajkunawan kawsakuychej. Amataj yuyayniykichejpi yachaysapas kasqaykichejta yuyakuychejchu. 17 Ama pimampis sajramanta sajrallatataj kutichiychejchu; allin kajtapuni ruwaj churakuychej tukuy runaj ñawpaqempi. 18 Atisqaykichejman jina tukuy runaswan allimpi kawsakuychej. 19 Munasqa hermanosníy, ama ima sajramantapis pagachikuychejchu, manachayqa saqeychej Dios phiñakuynimpi jasut'inanta. Diosmanta Qhelqasqapi nin: Noqa pagachikusaj jasut'ispa, nin Señorqa. 20 Chayrayku enemigoyki yarqhachikojtenqa, mikhuyta qoriy; ch'akichikojtimpis, yakuta jaywariy. Chayta ruwaspaqa, nina brasaswan jina p'enqaypi uyanta k'ajarichinki. 21 Ama sajra kajwan atipachikuychu, astawanqa sajra kajta allin kajwan atipay.
