APOCALIPSIS 8

1Qanchis kaj sellota Cordero kicharejtenqa, janaj pachapi khuskan horata jina ch'inlla karqa. 2Rikorqanitaj Diospa ñawpaqempi qanchis angelesta sayashajta. Chantá paykunamanqa qanchis cornetas qosqa karqa. 3Waj angeltaj jamuspa, altarpa ñawpaqempi sayaykorqa, qorimanta incienso q'oshñichina jap'irisqa. Ashkha inciensotaj payman jaywasqa karqa, Diospa tukuy ajllakusqasnimpa mañakusqankuman yapaykunampaj kamachina tiyanaj ñawpaqempi, chay qori altarpi. 4Chay incienso q'oshñichisqanqa angelpa makinmanta Diospa ñawpaqenman wicharerqa, Diospa ajllakusqasnimpa mañakusqasninkuwan khuska. 5Chay angeltaj incienso q'oshñichinata jap'ispa, altar patapi kaj ninawan junt'aykucherqa. Chaytataj kay pachaman jich'aykamorqa. Chaypacha rikhurerqa qhon qhonkuna, lliuj lliujkuna, jallp'a kuyuriy ima. 6Chantá chay qanchis angelesqa wakichikorqanku, sapa uj cornetata waqachinampaj. 7Ñawpaj kaj angelqa cornetata waqacherqa; chaypacha, granizo, ninawan, yawarwan ima chajrusqa kay pachaman urmamorqa. Kay pacha kinsa t'aqasqamanta ujnin kaj t'aqaqa ruphaykorqa, jinallataj sach'asmantapis, tukuy q'omer qhorapis. 8Iskay kaj angelqa cornetata waqacherqa. Chantá uj jatun orqo jina, ninawan larwashaj mama qochaman urmaykamorqa, jinapitaj mama qocha kinsaman t'aqasqamanta ujnin kaj t'aqaqa yawarman tukuporqa. 9Mama qochapi kawsajkunamanta kinsa t'aqasmanta ujnin kaj t'aqa wañorqa, barcospis kinsaman t'aqasqamanta ujnin kaj t'aqaqa phirisqa karqanku. 10Kinsa kaj angelqa cornetata waqacherqa. Chantá cielomanta uj jatun ch'aska urmamorqa, uj k'anchay jina larwarispa; mayus kinsaman t'aqasqamanta ujnin kaj t'aqaman urmamorqa, jinallataj yaku juturismanwan. 11Chay ch'askaj sutenqa Ajenjo nisqa karqa. Jinapi yakus kinsaman t'aqasqamanta ujnin kaj t'aqa jayaman tukuporqa, ashkha runastaj chay yakuswan wañurarqanku jaya kasqanrayku. 12Tawa kaj angelqa cornetata waqacherqa. Chantá inti, killa, ch'askas ima kinsaman t'aqasqamanta ujnin kaj t'aqa mana allinman tukorqa, ajinamanta laqhayasqa kanankupaj. Chayrayku p'unchaypis tutapis kinsaman t'aqasqamanta ujnin kaj t'aqa mana ima k'anchayniyojchu karqa. 13Rikorqanitaj uj ankata chawpi cielota phawashajta, uyarerqanitaj nejta: Ay, ay, ay kay pachapi tiyakojkunamanta, imaraykuchus chay kinsa angelesraj cornetasta waqachinanku kashan, nispa.

will be added

X\