APOCALIPSIS 6

1Chay qhepata, qhawashajtillay Corderoqa kicharerqa ñawpaj kaj sellota, uyarerqanitaj chay tawa kawsajkunamanta ujninta nejta, qhon qhompis sonanman jina: Chimpamuy, nispa. 2Chantá qhawashaspa, chaypi rikorqani uj yuraj caballota. Patampi lloq'asqa kajtaj uj flechana arcota jap'isharqa. Payman uj pilluta qorqanku. Atipaspa llojserqa, atipanallampajtaj. 3Iskay kaj sellota Cordero kicharejtenqa, iskay kaj kawsajta uyarerqani nejta: Chimpamuy, nispa. 4Chantá uj puka caballo llojsimorqa. Chaypa patampi lloq'asqa kajmantaj atiy qosqa karqa allin kawsayta kay pachamanta qhechunampaj, ujkuna ujkunataj wañuchinakunankupaj. Uj jatun espada payman qosqa karqa. 5Kinsa kaj sellota Cordero kicharejtenqa, kinsa kaj kawsajta uyarerqani nejta: Chimpamuy, nispa. Chantá rikorqani uj yana caballota. Chay patampi lloq'asqa kajqa pesasta makimpi jap'isharqa. 6Chay tawa kawsajkunaj chawpinmantataj uj parlayta jina uyarerqani: Iskay libra trigo uj denario qolqepaj, sojta libra cebadataj uj denario qolqepaj. Aceiteta, vinotapis ama imanaychu, nispa nejta. 7Tawa kaj sellota Cordero kicharejtenqa, tawa kaj kawsajta uyarerqani nejta: Chimpamuy, nispa. 8Rikullarqanitaj uj q'ellu caballota. Patampi lloq'asqa kajpata sutenqa Wañuy karqa, Ukhu Pacha nisqataj qhepitampi karqa. Jinapitaj payman atiy qosqa karqa kay pachamanta khuskampa khuskannin runasta wañuchinampaj espadawan, yarqhaywan, onqoykunawan, kay pachapi k'ita animaleswan ima. 9Phishqa kaj sellota Cordero kicharejtenqa, altar urapi almasta rikorqani, pikunachus wañuchisqa kasqanku Diospa Simi Nisqanrayku, Paymanta testigo jina willarasqankuraykutaj, chaykunata. 10Sinch'itataj qhaparisharqanku: Tukuyta Kamachej Señor, santo kaj, cheqa kajtaj, jayk'ajkamataj kay pachapi tiyakojkunata mana juzgankichu, nitaj yawarniyku jich'asqa kasqanmanta cuentata mañankichu? nispa. 11Chantá yuraj p'achas sapa ujninkuman qosqa karqa nerqankutaj uj pisitawan samarinankuta, kamachi masi, hermanosninku chayamunankukama, pikunachus wañuchisqallataj kananku karqa, chaykuna. 12Sojta kaj sellota Cordero kicharejtenqa, manchay jallp'a ikhakuy karqa. Inteqa yanayarqa uj qhashqa yana p'acha jina, killataj yawar pukaman jina tukorqa. 13Cielopi ch'askastaj kay pachaman urmaramorqanku, imaynatachus higo sach'ata wayra thalaspa, higosta urmarachin, ajinata. 14Cielotaj ithirikaporqa, imaynatachus uj qhelqasqa k'uyuna libro k'uyuykukun, ajinata. Tukuy orqostaj, yaku pata churu jallp'aspis kasqankumanta kuyurerqanku. 15Kay pachapi reyes kajkuna, kurajkuna, soldadosta kamachejkuna, qhapajkuna, atiyniyojkuna, tukuy kamachis, mana kamachis kajkunapis qaqa jusk'uspi, orqo jusk'uspi ima pakaykukorqanku. 16Orqosta, qaqastapis qhaparikorqanku: Pataykuman urmaykamuspa, pakaykuwayku jaqay kamachina tiyanapi tiyajpa rikuyninmanta, Corderoj k'ajaj phiñakuyninmantawan. 17Imaraykuchus Paypa k'ajaj phiñakuynimpa jatun p'unchaynin chayamunña. Pitaj atenqa aguantaytari? nispa.

will be added

X\