APOCALIPSIS 20

1Chantá rikorqani uj angelta janaj pachamanta urayk'amushajta, makimpitaj ukhu pachaj llaventa jap'ishajta, uj jatun cadenatawan. 2Payqa Sierpeta presocharqa, chay ñawpa katarita, Kuraj Supay, Satanás sutiyojta. Paytataj waranqa wataspaj wataykorqa. 3Ukhu pachamantaj payta wijch'uykorqa, wisq'aykuytawantaj llaveykorqa, chantá patanta sellaykorqa, amaña runasta ch'awkiyanampaj waranqa watas junt'akunankama. Chay qhepatataj kacharisqa kanqa pisi p'unchaykunallapaj. 4Rikullarqanitaj kamachina tiyanasta. Chaykuna patapitaj tiyaykukorqanku pikunachus atiyta jap'erqanku juzganankupaj, chaykuna. Umasninku qholusqakunaj almasninkutapis rikullarqanitaj, pikunachus Jesusmanta, Diospa Simi Nisqanmantawan willasqanku, chaykunata. Paykunaqa millay animalta mana yupaychasqankuchu, nitaj lantintapis, manallataj frentesninkupi, chayrí makisninkupipis marcawan marcachikusqankuchu. Chaykunaqa kawsarimporqanku, kamacherqankutaj Cristowan khuska waranqa watasta. 5Chay waj wañusqasqa mana kawsarimporqankuchu waranqa watas junt'akunankama. Chaymin ñawpaj kaj kawsarimpoyqa. 6Kusikuyniyojmin, Diospaj t'aqasqataj kanku pikunachus ñawpaj kaj kawsarimpuypi kawsarimpojkunaqa. Qhepan kaj wañoyqa manaña paykunata imanayta atinchu, astawampis, paykunaqa Diospata Cristojtawan sacerdotesninku kanqanku, Paywantaj waranqa watasta kamachenqanku. 7Waranqa watas junt'akojtin, Satanasqa watasqa kasqanmanta kacharisqa kanqa. 8Paytaj llojsenqa nacionesta ch'awkiyaj, kay pachaj tawantin k'uchupi kashanku, chaykunata, Gogta, Magogtawan. Chaykunatataj wañuchinaku maqanakupaj tantanqa. Paykunaqa mana yupay atina kanku mama qocha kantupi t'iyu chhikapuni. 9Paykunaqa wicharimuspa, tukuy pampata llump'irimorqanku; Diospa ajllakusqasnimpa jarankuta muyuykorqanku, chay munasqa llajtatawan. Jinallapi janaj pachamanta nina urayk'amuspa, paykunata q'olarparerqa. 10Paykunata ch'awkiyaj, chay Kuraj Supayqa azufrewan larwashaj nina qochaman wijch'uykusqa karqa, maypichus chay millay animal, llulla profetawan kasharqanku chayman, chaypitaj tuta p'unchay, wiñaypa wiñayninkama ñak'arenqanku. 11Chay qhepata rikorqani uj jatun yuraj kamachina tiyanata, chaypi tiyasqa kashajtawan. Paypa ñawpaqenmantataj kay pacha, cielopis ayqerqanku, manañataj may lugarpis paykunapaj karqachu. 12Rikullarqanitaj wañusqasta juch'uyta, jatunta Diospa ñawpaqempi sayashajta. Chantá libros kicharisqa karqanku, jinallataj waj libropis kicharikorqa. Chayqa kawsay libro karqa. Chay wañusqastaj juzgasqa karqanku, imamantachus librospi qhelqasqa kasqanmanta, ruwasqankuman jina. 13Mama qochaqa chaypi wañusqa kajkunata jaywaporqa. Wañuypis, ukhu pachapis chaypi wañusqa kajkunata jaywapullarqataj. Sapa uj runataj juzgasqa karqa ruwasqasninman jina. 14Wañuywan, ukhu pachawan nina qochaman wijch'usqa karqanku. Chay nina qochamá iskay kaj wañoyqa. 15Kawsay libropi mana qhelqasqa kajqa, nina qochaman wijch'uykusqa karqa.

will be added

X\