APOCALIPSIS 15

1Rikorqani janaj pachapi waj jatun señalta t'ukunapaj jina. Qanchis ángeles jap'isharqanku qanchis qhepa kaj castigosta, imaraykuchus chaykunawan Diospa phiñakuynin junt'akunan karqa. 2Rikullarqanitaj vidriomanta jina uj jatun qochata ninawan chajrusqata. Ajinallatataj rikorqani pikunachus phiña animalta, lantintawan, marcantawan, sutimpa yupaynintawan atipajkunata vidriomanta jatun qocha patapi sayashajta, Diospa arpasnin jap'irisqas. 3Paykunataj Diospa kamachin Moisespa takiyninta, Corderoj takiynintawan takisharqanku: Ancha jatuchaj, t'ukunapajtaj ruwasqasniykeqa, Tukuy Atiyniyoj Señor Dios. Ñankunaykeqa cheqan, cheqataj kanku. Qanqa tukuy nacionespa Reynin kanki. 4Pitaj mana Qanta manchachikunmanchu, Señor? Pitaj sutiykita mana jatunchanmanchu? Qanllamin Santo kanki. Tukuy runas ñawpaqeykiman jamonqanku, yupaychasonqankutaj, imaraykuchus cheqanta justiciata ruwasqasniykeqa sut'inchasqa kanku, nispa. 5Chay imaspa qhepanta rikorqani templota janaj pachapi kicharisqata, Dioswan Tinkukuna, chay toldota. 6Chay templomanta qanchis ángeles llojsimorqanku qanchis castigos jap'irisqas, llimphu lliphipishaj linowan p'achallisqas, pechosninkutaj qori chumpiwan chumpisqas. 7Chantá chay tawa kawsajkunamanta ujnin kajqa, chay qanchis angelesman qanchis qori vasosta jaywarqa, Diospa phiñakuyninwan junt'asqasta, pichus wiñay wiñaypaj kawsan, chaypata. 8Templomantaj q'oshñi junt'aykorqa, Diospa jatun kaynimpa k'anchayninmanta, jatun atiyninmantawan. Mana pipis temploman yaykuyta aterqachu, chay qanchis angelespa makimpi castigos junt'akunankama.

will be added

X\