APOCALIPSIS 12

1Uj jatun señal cielopi rikhurerqa: Intiwan p'achallisqa uj warmi rikhurerqa. Killaqa chakisnin urapi karqa, uman patapitaj uj pillu chunka iskayniyoj ch'askasniyoj karqa. 2Wijsallisqa kaspataj, nacechikunampaj ñak'arispa qhaparisharqa. 3Waj señalpis cielopi rikukullarqataj: Uj jatun puka sierpe rikhurillarqataj, qanchis umasniyoj, chunka wajrasniyoj, sapa umampitaj pilluyoj. 4Chupanqa cielopi ch'askas kinsaman t'aqasqamanta ujnin kaj t'aqata pichaspa, kay pachaman wijch'uykamorqa. Chay sierpeqa nacechikunayashaj warmej ñawpaqempi sayaykorqa, nacechikojtinkama wawanta oqoykunampaj. 5Chantá chay warmeqa uj qhari wawata nacechikorqa, pichus tukuy nacionesta fierro varawan kamachenqa, chayta. Chay warmej wawantaj oqharisqa karqa Diospa ñawpaqenman, kamachina tiyanan, chayman. 6Chay warmitajrí ch'innejman ayqerqa, maypichus uj cheqata Dios paypaj wakicherqa, chayman. Chaypitaj waranqa iskay pachaj sojta chunkayoj p'unchayta pay mikhuchisqa karqa. 7Chaymanta jatun wañuchinaku maqanaku janaj pachapi karqa. Arcángel Miguelqa, angelesnin ima sierpewan maqanakorqanku. Sierpepis sajra angelesninwan Miguelpa contranta maqanakullarqankutaj. 8Manapuni Miguelta atiparqankuchu, janaj pachapitaj sierpewan, angelesninwan mana qhepakuyta aterqankuchu. 9Chay jatun sierpe jawaman wijch'usqa karqa; chayqa chay unay ñawpa katari, pichus sutichasqa Kuraj Supay, Satanastaj. Payqa llullakuspa kay pachapi kaj chhika runasta pantachin. Payta, sajra angelesnintawan kay pachaman wijch'umorqanku. 10Janaj pachamanta uj sinch'i parlamojta uyarerqani: Kunanqa Diosninchejpa salvacionnin, atiynin, reinompis chayamunña, Cristompa atiynimpis. Hermanosninchejta ch'atajqa wijch'usqa kashan, pichus tuta p'unchay Diosninchejpa ñawpaqempi paykunata ch'ataykoj, chay. 11Hermanosninchejqa payta atiparqanku Corderoj yawarninrayku, Diospa Simi Nisqanta willasqankurayku, kawsayninkutataj pisipaj qhawasqankurayku wañunankukama. 12Chayrayku kusikuychej janaj pachakuna, chaypi tiyakojkunapis. Ay, kay pacha jallp'a patapi, mama qocha patapipis tiyakojkunamanta, imaraykuchus Kuraj Supayqa manchay phiñasqa qankunaman urayk'amun, yachaspa paypaj pisi tiempollaña kasqanta. 13Chay sierpeqa kay pachaman wijch'usqa kasqanta rikuspa, qhari wawata nacechikoj warmita qhatiykacharqa. 14Warmimantaj jatun ankajpa iskaynin lijrasnin qosqa karqa sierpemanta ayqespa, phawanampaj ch'innejman, tiyakunampaj wakichisqa kashan chayman, maypitajchus mikhuchisqa kanan kashan kinsa wata khuskanniyojta, chayman. 15Chantá sierpeqa warmej qhepanta simin junt'amanta yakuta phullchichimorqa mayuta jina, chay warmita yaku apanampaj. 16Kay pachatajrí warmita yanapanampaj siminta kicharispa chay mayu yakuta ch'onqaykorqa, mayqentachus sierpeqa siminmanta phullchichimusqa, chayta. 17Chaypachataj sierpeqa warmipaj mayta phiñakuspa, rerqa warmej mirayninmanta chay wajkunawan maqanakoj, pikunachus Diospa kamachisqasninta kasunku, Jesuspa willasqasnintataj jap'inku, chaykunawan.

will be added

X\