SALMOS 96

1Uj mosoj takiyta Tata Diosman takiychej; kay pachapi tukuy tiyakojkuna, Tata Diosman takirikuychej. 2Tata Diosman takirikuychej, sutintataj yupaychaychej; sapa p'unchay willaychej salvacionninmanta. 3Jatun kayninmanta tukuy nacionesman willaychej, chay sumachaj ruwasqasninmantataj tukuy ayllusman parlaychej. 4Diosqa may jatunmin, yupaychanapaj jinapuni; tukuy dioskunamanta nisqaqa aswan manchachikuna. 5Waj aylluspa diosninkukunaqa manakaj lantislla kanku. Tata Diostajrí cielosta ruwarqa. 6Ñawpaqempeqa jatun kaynimpa k'anchaynin lliphipishan. Yupaychana wasimpitaj atiywan, k'acha kaywan tiyan. 7Tukuy naciones, Tata Diosta yupaychaychej, jatunchaychejtaj. 8Tata Diosta yupaychaychej jatun kayninman jina, pationmantaj jaywanas aparisqa yaykuychej. 9Tata Diosta yupaychaychej moq'ena may k'acha santo kaynimpi, ñawpaqempitaj tukuy runas kharkatichunku. 10Tukuy nacionesman niychej: Tata Diosqa rey; Paymin kay pachata sinch'ita sayacherqa, mana kuyunampaj jina. Payqa tukuy runasta kamachin uj rejllatapuni, nispa. 11Kusikuchunku cielos, kay pachapis; mama qochapis sonarichun, tukuy chaypi kajkunapis. 12Kusikuchunku tukuy jallp'as, tukuy ima chaypi kajpis. Monte sach'aspis kusikuywan qhaparichunku. 13Kusikuchunku Tata Diospa ñawpaqempi, imaraykuchus Pay jamushan. Payqa jamushan ari kay pachata juzganampaj. Kay pachapi tukuy runasta juzganqa maychus kajwan, cheqa kajwantaj.

will be added

X\