SALMOS 92

1Patapi Kaj Tata Dios, ancha sumajpuni Qanman graciasta qonaykoqa, takipusunaykutaj, Qanta jatunchaspa. 2Sut'iyayta khuyakuyniykimanta willarasaj, ch'isisnintaj cheqa kayniykimanta. 3Cuerdasniyoj tocanaspa waqaynimpi, arpaj k'acha waqaynimpiwan Qanmanta willarasaj. 4Tata Dios, ruwasqasniykiwan kusichiwanki; makisniykej ruwasqasnenqa kusichiwanku. 5Tata Dios, may jatunmin ruwasqasniykeqa, yuyasqasniykitaj mana unanchay atina. 6Wampu runaqa chayta mana yachanchu, mana yuyayniyoj runataj mana chayta entiendenchu. 7Sajra runasqa qhora jina wiñanku. Tukuy sajrata ruwajkunataj t'ika jina phancharinku, ruthusqa, wiñaypaj chinkarisqa kanallankupaj. 8Qantajrí Tata Dios, may jatunchasqa kanki wiñaypaj. 9Cheqapuni kayqa: Enemigosniyki t'unasqa kanqanku, Tata Dios; tukuy sajra ruwajkunapis ch'eqerasqa kanqanku. 10Qan kallpata yapawanki, toroj kallpanta jina, umaymantaj k'acha q'apayniyoj aceitewan jawiwanki. 11Enemigosniy urmasqankuta ñawisniy rikun, contraypi jatarejkuna sajra runaspa qhaparisqankutataj ninrisniy uyarin. 12Cheqan runasqa palma sach'a jina t'ikarenqanku, Libanopi cedro sach'as jinataj wiñanqanku. 13Tata Diospa wasimpi plantasqa kaspa, Diosninchejpa patiosnimpi t'ikarenqanku. 14Machu kayninkupipis poqollanqankupuni; sinch'illapuni, q'omerllapunitaj kanqanku. 15Chaywan sut'ita rikuni jark'akuwajniy Tata Diosqa cheqan kasqanta.

will be added

X\