SALMOS 9

1Tata Dios, tukuy sonqoywan yupaychasqayki, chhika k'acha ruwasqasniykimantataj willamusaj. 2Patapi Kaj Diosníy, Qampi kusikusaj, sonqo junt'asqataj sutiykiman takirisaj. 3Ñawpaqeykimanta enemigosniy ayqenku, urmanku, wañunkutaj. 4Qanqa cheqan Juezmin kanki; kamachina tiyanaykipi tiyaykorqanki justiciata ruwanawaykipaj. 5Qampi mana creejkunata k'amerqanki, sajra runasta chinkacherqanki, qonqaymantaj paykunata wiñaypa wiñaynimpaj churarqanki. 6Enemigosqa wañuranku; chay llajtasninkutapis urmacherqanki, chinkacherqankitaj ni jayk'aj yuyarikunapaj jina. 7Tata Diosqa wiñaypa wiñaynimpajmin Rey. Payqa kamachina tiyananta sinch'ita sayachin juzganampaj. 8Cheqan kayman jina kay pachapi kaj chhika runasta juzganqa. Payqa maychus kajta juzganqa. 9Tata Diosqa ñak'arichisqa runaj pakakunan; phutiywan atipachikushajtinkupis, paykunata yanapan. 10Rejsisojkunaqa, Tata Dios, Qampi atienekusunku, imaraykuchus mask'asojkunataqa ni jayk'aj saqerparinkichu. 11Sionpi kamachej Tata Diosman takiriychej. Tukuy runasman ruwasqasninmanta willamuychej. 12Pichus yawarta jich'asqankumanta cuentata mañajqa mana qonqapunchu; Diosqa llakichisqa kajkunaj qhaparikuyninkuta uyarin. 13Tata Dios, noqamanta khuyakuway. Qhaway imaynatachus chejnikuwajkuna llakichiwasqankuta. Wañuy patapi kashajtiy, libraway. 14Jinataj Jerusalén punkupi willasaj Qan yupaychanapaj jina kasqaykita, salvawasqaykimanta kusisqa kasqaymantataj. 15Diospi mana creejkunaqa allasqanku t'oqollapitaj urmanku. Jap'ina ch'ipasta wakichisqallankupitaj chakisninkutapis jap'ichikunku. 16Tata Diosqa runaswan rejsichikun, cheqanta ruwaspa. Sajra runasrí jap'ichina ch'ipa ruwasqallankuwantaj ch'ipaykuchikunku. 17Sajra runasqa, pischus Diosmanta qonqapojkunaqa ukhu pachaman chayanqanku, Diosmanta qonqapusqankurayku. 18Wajchasrí manapuni qonqasqachu kanqanku. Diospi suyakuyninkoqa mana wiñaypaj chinkanqachu. 19Sayarikuy, Tata Dios, ama saqeychu pitapis runaykachajta. Qampi mana creejkunata ñawpaqeykipi juzgay. 20Manchachikuyta sonqonkuman churay, Tata Dios, reparachiytaj runaslla kasqankuta.

will be added

X\