1 Salvawaj Señor Tata Diosníy, tuta p'unchay ñawpaqeykipi mañakuyki. 2 Mañakusqayqa ñawpaqeykiman chayachun; qhaparikusqaytapis uyarillaway. 3 Chay jinatapuni mana allin imas chayamuwanku, wañuy patapiñataj kashani. 4 Wañusqaswan yupasqaña kani; mana kallpayoj runa jina rikhurini. 5 Ayaswan khuska wijch'usqa kani. Maqanakupi wañuchisqa jina p'ampasqa kani. Chaykunamantaqa Qan manaña yuyarikunkichu, makiykimanta t'aqasqa kasqankurayku. 6 Uj ukhu t'oqoman wijch'uykuwanki, ukhuspi laqha cheqaman. 7 Phiñakuyniykita noqapi thasnukunki; ashkha llakiy uraman chinkaykuchiwanki. 8 Kawsaqesniyta noqamanta karunchanki. Paykunapajqa millachikunanku kani. Wisq'asqa kani, manataj ayqeyta atinichu. 9 Chhikata waqasqaypi ñawisneyqa chharpuyashanña. Sapa p'unchay Qanta wajyakuyki, Tata Dios, makisniyta Qanman oqharispa. 10 Wañusqaspajqa t'ukuna imasta ruwawajchu? Wañusqasqa Qanta jatunchaj sayarimunkumanchu? 11 Munakuyniykimanta, cheqa kayniykimantawan covachapi wañusqasqa ukhupi parlankumanchu? 12 Chay laqhapeqa t'ukuna ruwasqasniyki rejsisqachu kanman? Cheqa kayniykipis qonqay jallp'api rejsisqachu kanman? 13 Noqatajrí, Tata Dios, Qanta qhaparikuyki, yanapata mañakuspa; mañakusqayta tutamantaqa Qanman chayachimuyki. 14 Imaraykutaj qhesachawanki, Tata Dios? Imaraykutaj noqamanta pakaykunki? 15 Wayna kasqaymantapacha llakisqa, wañuy patapitaj kani. Manchachiyniykiwan atipasqaña kani. 16 Sinch'i phiñakuyniykeqa patayta wasarin, manchachiyniykitaj phirita ruwawan. 17 Tukuy p'unchay phiñakuyniyki muyuykuwan, yakupis tukuy imata wasarinman jina. 18 Noqamanta munakusqasniyta, kawsaqesniytawan karunchanki, kunantaj chay laqhallaña kawsaqeyqa.
