SALMOS 86

1Tata Dios, uyarillaway, imaraykuchus ancha llakisqa, wajchataj kani. 2Kawsayniyta waqaychay, imaraykuchus Qanta kasuspa kawsakuni. Qanmin Diosniy kanki; Qampi atienekoj kamachiykitaqa salvaway ari. 3Tata Dios, khuyakuy noqamanta, imaraykuchus Qanta tukuy p'unchay wajyakuyki. 4Señorníy, kusichiy kay kamachiykej sonqonta, imaraykuchus Qanllamanta mañakuyki. 5Qanqa k'acha kanki, perdonanapaj wakichisqa; Qanta wajyakojkunapaj jatun munakuyniyoj kanki. 6Tata Dios, uyariy mañakususqayta; mañakusqaytaqa uyarillaway, ari. 7Llakiyniypeqa Qanman qhaparikusqayki, imaraykuchus Qan uyariwanki. 8Señorníy, Qan jina diosqa mana kanchu; ruwasqasniyki jinaqa manallataj kanchu. 9Tata Dios, churasqayki naciones jamuspa, Qanta yupaychasonqanku, sutiykitataj jatunchanqanku, 10imaraykuchus jatun Dios kanki, may t'ukuna imastataj ruwanki. Qanlla Dios kanki. 11Tata Dios, ñanniykita rejsichiway, noqa chaynillantapuni purinaypaj. Uj yuyayllata ruwaway sutiykita jatumpaj qhawanaypaj. 12Señor Tata Diosníy, tukuy sonqo graciasta qospa, yupaychasqayki, sutiykitataj jatunchasajpuni wiñaypaj, 13imaraykuchus munakuyniykeqa noqapaj jatun, Qantaj almayta ukhu pachamanta kacharicherqanki. 14Diosníy, may kasqankuta yuyakojkunaqa contraypi oqharikuspa, wañuchiwayta munanku, nitaj Qanmanta yuyarikunkuchu. 15Qanrí, Señor, khuyakoj sonqoyoj Dios kanki, mana usqhayta phiñarparikoj, munakuypi jatun, cheqa kaypitaj. 16Noqaman kutirikamuway, khuyakuwaytaj; kallpachaway, salvawaytaj kay kamachiykita. 17Noqawan k'acha kasqaykimanta señalta rikuchiway, chayta rikuspa, chejnikuwajkunaqa p'enqachisqa kanankupaj, imaraykuchus Qan, Tata Dios, sonqochawanki, yanapawankitaj.

will be added

X\