SALMOS 84

1Tiyakuna wasiykeqa manchay k'achitu, Tukuy Atiyniyoj Tata Dios. 2May jinatapuni wañurini Temploykej patiosnimpi kaymanta; tukuy sonqoywan, tukuy almaywan kawsayta qoj Diosman takini. 3Phichitankaspis, para p'isqospis altaresniyki qayllapi wasita tarinku, chaypi irpitasninkupaj thapachakunankupaj, Tukuy Atiyniyoj Tata Dios, Reyníy, Diosníy. 4Kusikuyniyojmin kanku wasiykipi kawsakojkunaqa. Paykunaqa jatunchallasunkupuni. 5Kusikuyniyojmin kanku Qampi kallpata tarejkunaqa, pikunachus orqoykikama chayayta munajkuna. 6Ch'aki valleta pasashaspa, yaku juturisniyojman tukuchenqanku, ñawpaj parastaj qochasman junt'aykun. 7Paykunaj kallpankoqa astawan astawan yapakonqa, Sionpitaj jatun Diospa ñawpaqempi rikhurenqanku. 8Tukuy Atiyniyoj Tata Dios, Jacobpa Diosnin, uyariy mañakususqayta. 9Jark'akuwajniyku Dios, allin ñawiwan qhaway Qampaj ajllakusqayki reyta. 10Uj p'unchayllapis patiosniykipi kayqa aswan sumaj, waranqa p'unchaykunata karupi kanamanta nisqaqa. Astawanqa munayman Diospa wasi punkunta qhawaspa tiyakuyta sajra cheqaspi tiyakunaymantaqa. 11Señor Tata Diosqa k'anchawanchej, waqaychawanchejtaj. Tata Diosqa k'acha yanapayninta qon, allin ñawiwantaj qhawan llimphu sonqo kawsakojkunata, tukuy ima allintataj paykunaman qollampuni. 12Tukuy Atiyniyoj Tata Dios, kusikuyniyojmin kanku Qampi atienekojkunaqa.

will be added

X\