SALMOS 83

1Diosníy, ama ch'inlla kakuychu; amapuni ch'inlla pachampi kaychu. 2Qhaway ari imaynatachus enemigosniyki chejnikususpa ch'ajwasqankuta, contraykipi oqharikuspa. 3Paykunaqa aylluykej contrampi trampasta wakichinku, munakusqasniykita urmachiyta munaspa. 4Jamuspa, tukuchiyta munawayku, amaña nación jina kanaykupaj, amañataj Israel suti uyarisqa kanampaj. 5Uj tratota contraykipi ruwaspa, uj runa jinalla kaykuna oqharikunku: 6Edommanta kajkuna, Ismaelmanta kajkuna, Moabmanta kajkuna, Agarpa mirayninmanta kajkunapis, 7Gebalmanta kajkuna, Amonmanta kajkuna, Amalecmanta kajkuna, filisteosmanta kajkuna, Tiropi tiyakojkuna ima. 8Asiriospis paykunawan tantakullankutaj; paykunaqa Lotpa miraynimpaj paña makisnin jina kanku. 9Paykunata ruway, imaynatachus Madianta ruwarqanki, jinata; imaynatachus Sisarata ruwarqanki, ajinata; imaynatachus Cisón Wayq'opi Jabintapis ruwarqanki, ajinata. 10Paykunaqa Endorpi t'unasqa karqanku; jallp'apaj wanuman jina tukuchisqa karqanku. 11Ruway ari kuraj runasninkuta, imaynatachus Orebta, Zeebta ruwarqanki, ajinata. Ruway ari kamachejninkukunata, imaynatachus Zebata, Zalmunata ima ruwarqanki, ajinata. 12Paykuna nerqanku: Diospa tiyakunanta jap'ikapunachej, nispa. 13Diosníy, muyoj wayraj apanan jallp'ata jina paykunataqa ruway, wayraj apanan q'opata jinataj. 14Imaynatachus sach'asta nina ruphaykun, imaynatatajchus nina larway orqosta q'olaykun, 15ajinata paykunata qhatiykachay sinch'i paraykiwan; sinch'i muyoj wayraykiwan paykunata kharkatichiy. 16Sinch'ita paykunata p'enqaykuchiy, Tata Dios, Qanta mask'asunankupaj. 17Paykunaqa p'enqaypipuni kachunku; p'enqaypi kashaspapuni, wañuchunku. 18Yachachunku Qan Tata Dioslla Patapi Kaj Dios kasqaykita tukuy kay pachapi.

will be added

X\