SALMOS 81

1Kusiywan Diosman takirikuychej; Paymin kallpanchej. Kusiywan qhaparispa, Jacobpa Diosninta jatunchaychej. 2Takirikuychej panderowan, arpawan, cuerdasniyojpa misk'i waqayninwan ima. 3Putututa waqachiychej killa qallarikuyta, jinallataj killa junt'a kajtimpis; chay p'unchayqa jatun p'unchayninchej. 4Kay kamachisqata Jacobpa Diosnenqa Israelman yachacherqa. 5Chayta Diosninchejqa Joseman qosqa Egiptomanta orqhomushaspa, maypachachus mana rejsisqa parlayta uyarerqanchej chaypacha. 6Pay nerqa: Wasankumanta llasa q'epita q'epiracherqani; sinch'i trabajomanta paykunata orqhorqani. 7Llakiyniykipi wajyakuwarqanki, Noqataj librarqayki; qhon qhon phuyu ukhumanta kutichimorqayki. Meriba yaku chimpapi probarqayki. 8Uyariy, ayllúy, kay k'amisusqayta; Israel, imaynapichus uyariwankiman. 9Ama waj dioskunayojqa kaychu. Ama waj dioskunataqa yupaychaychu. 10Noqa Tata Diosmin Diosniyki kani, pichus orqhomorqayki Egipto jallp'amanta, chay. Simiykita kichariy, Noqataj, munayniykiwan junt'achisaj. 11Chaywampis aylloyqa mana uyariwarqachu; Israelqa mana kasukuwarqachu. 12Chayrayku sonqonkoj munasqanta ruwajta saqerqani, yuyasqankuman jinataj kawsarqanku. 13Aylluychus uyariwanman karqa chayqa, Israeltajchus ñankunayta purinman karqa chayqa, 14Noqaqa uj ratollapi enemigosninta k'umuykachachiyman karqa, castigaymantaj karqa llakichejkunata. 15Tata Diosta chejnikojkunaqa ñawpaqenman mancharisqa urmankuman karqa, juchachasqa kasqankutaj mana tukukuyniyoj kanman karqa. 16Diostaj aswan sumaj trigota ayllunman mikhuchinman karqa, chhanka jusk'usmanta orqhosqa misk'iwantaj paykunata sajsachinman karqa.

will be added

X\