1 Israelpa Michejnin, pichus José aylluta ovejasta jina pusaykachaj, uyariwayku. Querubinespa chawpinkupi kashanki, chaymanta k'anchaykamuy. 2 Atiyniykiwan rijch'ariy Efraínpa, Benjaminpa, Manasespa ñawpaqempi ima; atiyniykiwan jamuspa, salvawayku. 3 Diosniyku, ñawpa kasqaykuman kutirichiwayku. Allin ñawiwan qhawawayku, salvasqa kanaykupaj. 4 Tukuy Atiyniyoj Señor Tata Dios, mayk'ajkamataj phiñasqa kanki aylluykej mañakusqanmantari? 5 Qanqa waqayniykuta mikhuchiwayku, jik'un jik'unta waqasqaykutataj ashkhata ujyachiwayku. 6 Qayllaykupi kajkunaj kusipayananta ruwawayku, enemigosniykutaj noqaykumanta asikunku. 7 Tukuy Atiyniyoj Diosniyku, ñawpa kasqaykuman kutirichiwayku. Allin ñawiwan qhawawayku, salvasqa kanaykupaj. 8 Egiptomanta uva sach'ata orqhomorqanki. Chantá Qanta mana rejsisoj nacionesta uj cheqamanta wijch'uspa, chayman chay uva sach'ata plantaykorqanki. 9 Jallp'ata wakicherqanki, chay uva sach'ataj saphichakuspa, tukuy suyuntinman junt'aykorqa. 10 Orqosta llanthunwan qhataykorqa. Aswan jatun cedro sach'astapis p'ampaykorqa. 11 Jatun Qochakama ramasnin chayarqa, ijiynintaj Éufrates Mayukama. 12 Imaraykutaj chantá jark'achasninta urmacherqanki, ñan purejkuna poqoyninta p'itinankupajri? 13 Monte khuchis, k'ita animales ima oqokapunku uva sach'aykita. 14 Atiyniyoj Dios, kutirimullay ari, janaj pachamantapacha qhawarimullayña. Sonqoykita nanachikuspa, waturikullayña kay uva sach'aykita, 15 Qan kikiyki plantasqaykita, ijimojkunata sumajta wiñachisqaykita. 16 Uva sach'aykeqa k'utusqa kashan, ruphachisqataj; k'amisqallaykiwan aylluykeqa chinkachisqa kanku. 17 Yanapariy ajllasqayki runata, Qampa kallpachasqayki runaj churinta. 18 Manaña jayk'ajpis Qanmanta karunchakusqaykuchu. Kawsayta qowayku, noqaykutaj sutiykita oqharisqayku Diosniykupaj rejsikapuspa. 19 Tukuy Atiyniyoj Señorniyku Tata Dios, ñawpa kasqaykuman kutirichiwayku. Allin ñawiwan qhawawayku, salvasqa kanaykupaj.
