SALMOS 79

1Diosníy, waj naciones herenciayki jallp'aman yaykuykamunku. Santo Temploykita ch'ichichanku, Jerusalentataj raqayman tukuchinku. 2Ajllakusqayki kamachisniykej ayasninkuta suwintusman, k'ita animalesman ima qaraykorqanku. 3Yakuta jina yawarninkuta jich'arqanku tukuy Jerusalenpi, manataj pi p'ampaykoj karqachu. 4Qayllaykupi kajkunaj alqochakunan kayku, muyuyniykupi kajkunaj asikunantaj. 5Tata Dios, mayk'ajkamataj phiñasqa kankiri? Celoso kayniykeqa nina jinapunichu k'ajarenqa? 6Mana rejsisojkunaj nacionespa patankuman phiñakuyniykita jich'aykuy, pikunachus sutiykita mana oqharinkuchu, chaykunaj patankuman. 7Paykunaqa Jacobta oqoykorqanku, tukuynin llajtatataj ch'inman tukucherqanku. 8Ama noqaykuwan pagachikuychu ñawpa tatasniykoj sajra ruwasqasninkumantaqa. Khuyakuyniyki usqhayllata noqaykupaj jamuchun, imaraykuchus ancha llakisqa kashayku. 9Salvawajniyku Dios, yanapawayku, librawayku, juchasniykutataj pampachapuwayku sutiyki jatun kasqanrayku. 10Imaraykutaj Qanta mana qhatisojkuna ninkuman kasqa: Maypitaj Diosninku kashan? nispa. Ñawpaqeykupi tukuy nacionesman rikuchiy kamachisniykej wañuyninkumanta pagachikusqaykita. 11Uyariy presochasqa runaspa waqasqankuta, atiyniykiwantaj salvay wañuchinapaj juchachasqa kajkunata. 12Tata Dios, qayllaykupi kajkunaman qanchis kutita kutichiy, contraykipi millayta juchallikusqankumanta. 13Noqaykurí aylluyki kayku, q'omer pampasniykimanta ovejasniyki. Graciasta qollasqaykupuni, takisqaykutaj Qanta jatunchaspa wiñaypa wiñaynintimpaj.

will be added

X\