SALMOS 77

1Diosta sinch'ita qhaparikuni Pay uyarinawampaj. 2Llakiyniy p'unchaypi Tata Diosta mask'ani, mana sayk'uspataj, makisniyta Payman oqharini. Sapa ch'isi Paymanta mañakuni, manataj sonqochakuyta atinichu. 3Diosmanta yuyarikuspa waqani. Nini: Yuyayniyman churakusaj, nispa, kallpaytaj pisiyan. 4Qan Tata Dios, ch'irmiykojllatapis mana saqewankichu. Ni parlaytapis atinichu, pawisqa kasqayrayku. 5Ñawpa p'unchaykunamanta, ñawpa watasmanta ima yuyarikuni. 6Ch'isisnin takisqaymanta yuyarikuni. Sonqoypitaj unanchakuspa, tapukuni: 7Wiñaypajchu Señor qhesachawasun? Manachu watejmanta khuyaywan qhawariwasun? 8Khuyakuynenqa wiñaypajpunichu tukukapun? Imatachus ruwananta niwasqanchejpis wiñaypajchu tukukapun? 9Diosqa k'acha kayninta qonqapunmanchu? Chhika phiñasqapunichu kanman, manaña khuyakuyniyoj kanampaj? nispa. 10Patapi kaj Diosqa manaña imaynachus kaj kikinñachu; noqanchejwan kasqampi yuyajtiy, sonqoy nanawan. 11Yuyarikusaj tukuy sumaj ruwasqasninmanta; Tata Dios, yuyarikusaj ñawpa tiempospi t'ukuna imasta ruwasqasniykimanta. 12Tukuy chay ruwasqasniykipi unanchasaj; chay ruwasqasniykimanta t'ukurisaj. 13Diosníy, ñanniykeqa llimphupuni. Ima diostaj Qan Diosniyku jina jatunri? 14Qan ari t'ukunasta ruwaj Dios kanki. Atiyniykita tukuy runasman rejsichinki. 15Atiyniykiwan kacharicherqanki aylluykitaqa, Jacobpa wawasninta, Josejpa wawasnintawan. 16Diosníy, jatun qochaqa rikususpa, manchachikusorqa. Ukhu yakuspis kharkaterqanku. 17Phuyusqa ashkha yakusta jich'amorqanku; cielopi qhon qhon karqa, rayostaj flechas jina tukuynejman urmarqanku. 18Qhon qhonkuna sinch'ita uyarikun muyoj wayrapi. Lliuj lliujkuna kay pachantinta k'ancharerqa, jallp'ataj ikhakuspa kharkatiterqa. 19Jatun qochapi ñanta kicharerqanki, ashkha yakustataj pasarqanki, nitaj pipis maymanchus sarusqaykita tarerqachu. 20Ovejasta jina wawasniykita pusarqanki Moisesnejta, Aaronnejtataj.

will be added

X\