1 Diosninchejqa Judapi rejsisqa, sutintaj Israelpi may mentasqa. 2 Paypa toldo wasenqa Jerusalenpi kashan, tiyakunantaj Sión Orqopi. 3 Jaqaypi maqanakuna armasta p'akerqa: Jark'akuna escudosta, espadasta, flechanapaj arcosta, flechasta ima. 4 Qanqa may jatun kanki, Tata Dios, orqosmantapis aswan jatun kanki. 5 Kallpayojkunapis atipasqa karqanku, wañuy puñuytataj puñukaporqanku. Aswan wapu runaspis mana imatapis ruwayta aterqankuchu. 6 Tata Dios, Jacobpa Diosnin, Qan k'amejtiyki, maqanakunapaj carretaspis, caballospis mana kuyunkuchu. 7 Qanqa manchachikunamin kanki. Pitaj ñawpaqeykipi sayayta atinmanri, sinch'i phiñasqa kashajtiykiri? 8 Janaj pachamantapacha justiciaykita rejsichinki. Jallp'aqa manchachikun, kikimpitaj sayan, 9 Diosníy, juzganaykipaj sayaykojtiyki, tukuy kay pachapi llamp'u sonqoyojkunata salvanaykipaj. 10 Runaj phiñakuynenqa Qanta jatunchanaman tukun, uj chhikan phiñakuyninkupis pilluykiman tukun. 11 Qankuna Señorniykichej Tata Diospaj imatachus ruwanaykichejta niychej, chay nisqaykichejtataj junt'aychej. Qankuna, muyuynimpi kajkuna, manchachikuna Diosman sumaj jaywanasta jaywaychej. 12 Payqa kamachejkunaj kawsayninkuta qhechun, manchachintaj kay pacha reyestaqa.
