SALMOS 73

1Cheqamanta Diosqa Israelpaj may k'achapuni, jinallataj llimphu sonqo kajkunapajpis. 2Noqarí tumpamantawan urmayman karqa. Chakisneyqa yaqhalla llust'arqa. 3Sajra runas runaykachajkunaj qhapajyasqankuta rikuspa, paykunata envidiaykorqani. 4Paykunaqa wañuyta mana manchachikunkuchu; ni onqoyllatapis yachankuchu. 5Mana waj runas jina llakiyniyojchu kanku, nitaj ñak'arichisqachu kanku. 6Chayrayku jatunchakuyninkoqa paykunapaj walqas jina, atiyninkuwan sajrata ruwasqankupis p'achanku jina. 7Chhika wiras kasqankuwan ñawisninku chinkaykushanña, sajrata ruwayta munasqankutaj sonqonkumanta phullchimushan. 8Kusipayaspa, wapu wapus mana p'enqakuspa, sajra imasta sinch'i kallpankuwan ruwanankuta ninku. 9Siminkuwanqa janaj pachaj contranta parlanku; qallunkuwan tukuy kay pachapaj sajrata rimanku. 10Chayrayku runasqa paykunamanta allin kajllata ninku, manataj ima sajratapis paykunapi tarinkuchu. 11Paykuna tapunku: Diosqa yachanmanchu? Patapi kajqa reparanmanchu? nispa. 12Qhawaychej ari chay juchasapasta; ni pej ima nisqan qhapajyanku. 13Llimphu sonqo kawsakusqayqa yanqhalla, jinallataj makisniyta tukuy sajramanta mayllakusqaypis. 14Sapa p'unchay seq'osqa kani, sapa paqarintaj jasut'isqa. 15Paykuna jina parlasaj, nispa niyman karqa chayqa, wawasniykita wasanchayman karqa. 16Kayta umachakuyta munaspa, mana aterqanichu. 17Chantá Diospa wasinman yaykorqani, chaypacharaj sut'ita entienderqani maymanchus paykuna chayanankuta. 18Cheqamanta paykunataqa llust'anaman churanki, mana allin kajmantaj tanqaykunki. 19Uj ñawi ch'irmiypi pampachasqa rikhurinku. Manchachikoyqa paykunata tukuchin, wañuchintaj. 20Imaynatachus mosqoymanta uj runa rijch'arin, ajinata Qan sayarispa, Señor, k'acha jina kasqankuta qhesachanki. 21Noqa ancha llakisqa karqani, sonqoytaj t'ojsisqa jina nanarqa. 22Mana yuyayniyoj wampu runa karqani. Ñawpaqeykipeqa uywa jinalla karqani. 23Chaywampis, Qanwampuni kani. Paña makiymanta jap'iwanki. 24Yuyaychawasqaykiwan ñanta pusawanki. Chaymanta qhepatataj chhika patapi jap'ikapuwanki. 25Piniytaj janaj pachapi kapuwanri? Qanlla. Qanwan kaspaqa, kay pachapi mana imatawampis munaniñachu. 26Tukuy kayniy pisi kallpaman tukushan chaypis, Diosneyqa herenciay wiñaypaj, sonqoypa kallpantaj. 27Qanmanta karunchakojkunaqa wañonqanku, Qanta mana qhatisojkunatataj chinkarparichinki. 28Noqarí Diosman qayllakusaj. Noqapajqa chaymin aswan sumajqa. Tukuy Atiyniyoj Tata Dios, Qanmin pakakunay kanki, noqataj tukuy ruwasqasniykita willamusaj.

will be added

X\