1 Diosníy, salvaway, imaraykuchus llakiypi yaku ukhupi jina jeq'eqashaniña. 2 Chinkaykushani t'uru ukhuman. Mana mayman chakisniyta churakuyta atinichu sayanaypaj jina. Ukhu yakuman chayaykuni, yakutaj apawan. 3 Chhikata qhaparisqaypi sayk'uniña, kunkaytaj ch'akaña. Chhikata Diosniyta suyasqaymanta ñawisniy k'arashan. 4 Umaypi chujchasniymantapis aswan ashkha kanku qhasillamanta chejnikuwajkunaqa. Yanqhallamanta chejnikuwaj runasqa aswan atiyniyojman tukunku. Mañawankutaj mana suwasqayta kutichipunayta. 5 Diosníy, Qanqa yachanki wampu jina ruwasqayta. Qanmanta mana juchasniyta pakaykuyta atiymanchu. 6 Diosníy, Tukuy Atiyniyoj Dios, Qampi suyakojkunaqa ama p'enqaypi rikhurichunkuchu noqarayku. Israelpa Diosnin, amapuni noqaraykoqa q'enaqakuchunkuchu tukuy sonqo Qanta mask'ajkunaqa. 7 Qanrayku imaymanasta nichikuspa, ch'inllamanta kakuni. P'enqaywan mana yachanichu maymanchus uyayta churanayta. 8 Wawqesniypajqa forastero runa jina kani. Mamaypa churisnimpaj mana rejsisqa kani. 9 Wasiykita sinch'ita munakusqayrayku tukukushaniña; noqaj patayman urmamuwan Qanta qhesachajkunaj alqochakuyninku. 10 Waqajtiy, ayunota ruwajtiypis, alqochakuwanku. 11 Llakiy p'achata churakuspapis, tukuypa asipayanan kani. 12 Punkupi tiyajkunaj rimakunanku kani, machasqaspa takipayanankutaj. 13 Noqarí Tata Dios, Qanmanta mañakorqayki maychus tiempompi. Mayta munakuwasqaykirayku uyariway cheqa salvacionniykiwan. 14 Ama t'urupi chinkaykojta saqewaychu. Chejnikuwajkunamanta libraway, ukhu yakusmantapis salvaway. 15 Ama saqeychu sinch'i purej yakus apanawanta. Ama munaychu muyoj yaku ukhuman chinkaykuchispa oqoykunawanta. 16 Tata Dios, uyarillaway may k'acha munakuyniyoj kasqaykiman jina, may k'acha sonqoyoj kasqaykiraykutaj qhawarillaway ari. 17 Ama qhesachaychu kay kamachiykita, ari. Kay jina phutiypi kashani; usqhayllata uyariway. 18 Qayllaykamuy noqaman, salvawaytaj. Enemigosniymanta libraway. 19 Qan yachanki imaynatachus toreyawasqankuta, p'enqaypi rikhurisqayta, uyayta ni mayman churayta atisqaytawan. Qan rejsinki pikunachus enemigosniy kasqankuta. 20 Chejnikuwaspa, alqochakuwasqankumanta sonqoy p'akisqa kashan. Mana kallpayoj, uj jinayasqa kashani. Qhasillata mask'arqani sonqochawajta, noqamanta khuyakojta ima, manataj tarerqanichu. 21 Mikhunayman jayaq'eta churaykunku, ch'akiwajtintaj, vinagreta ujyachiwanku. 22 Kawsaqesninkuwan khuska sumajta mikhunankoqa tojllaman tukuchun paykunapaj. Allinyakuy mikhunankutaj misk'anankuman tukuchun. 23 Ñawisninkuta chharpuyachiy ama rikunankupaj. Chakisninkutaj kharkatispa, thalakuchun. 24 Phiñakuyniykita patankuman urmachiy, k'ajaj phiñakuyniykitaj paykunata taripachun. 25 Maypichus tiyakunanku ch'inyachisqa kachun. Toldosninkupis ch'impacha kachun. 26 Pitachus llakichisqaykita astawan qhatiykachanku. Pitachus nanachisqaykimantapis astawan alqochakunku. 27 Qan kutichiy sajramanta sajrallatataj. Khuyakuyniykita ama taripachunkuchu. 28 Kawsay libromanta chinkachiy. Ama sutisninkuta cheqan runaspatawan khuskata qhelqaykuychu. 29 Noqaqa onqosqa, llakisqataj kani. Oqhariway, Diosníy, salvawaytaj. 30 Takirikuspa, Diospa sutinta yupaychasaj. Tukuy sonqo agradecekuspa, Payta jatunchasaj. 31 Chaywan Tata Diosqa aswan sonqo junt'asqa kanqa, uj toro ñak'asqata, chayrí wajra p'utu torillota altarpi q'olachinamanta nisqaqa. 32 Chayta rikuspa, ñak'arichisqa kajkuna kusikonqanku, Diosta mask'ajkunaj sonqonkutaj kusiywan qhallallarenqa. 33 Tata Diosqa wajchasta uyarin, manataj qhesachanchu presochasqa runasta. 34 Tata Diosta jatunchachunku cieloqa, kay pacha, mama qocha ima, tukuy chaykunapi kawsajkunapis. 35 Diosqa Sionta salvanqa, watejmantataj Judapi llajtasta sayachenqa. 36 Chaypitaj tiyakonqanku, dueñochakaponqankutaj. Kamachisnimpa wawasninkutaj herenciankupaj llajtata jap'enqanku. Tata Diospa sutinta munakojkunapis chaypi tiyakonqanku.
