1 Diosman kusisqa takirikuychej, kay pachapi tukuy tiyakojkuna. 2 Paypa jatun sutinman takirikuychej. Yupaychaspa k'achituta takirikuychej. 3 Diosman niychej: Ruwasqasniykeqa may sumajpuni. Jatun atiyniykirayku enemigosniykeqa ñawpaqeykipi mancharisqa k'umuykonqanku. 4 Kay pachapi tukuy kajkunaqa Qanta yupaychasonqanku, sutiykimantaj takenqanku, jatunchasuspa. 5 Jamuychej Diospa ruwasqasninta qhawanaykichejpaj, runasrayku chay jina sumaj ruwasqasninta. 6 Jatun qochata ch'aki jallp'aman tukucherqa. Ñawpa tatasninchej jatun mayuta chakipi chimparqanku. Chayrayku Diospi kusikunachej. 7 Atiyninwan Diosqa wiñaypaj kamachin. Ñawisnenqa llajtasta allinta qhawan; Diosta mana kasojkuna ama contrampi oqharikuchunkuchu. 8 Tukuy naciones, Diosninchejta yupaychaychej. Uyarichiychej yupaychana takiykunata, 9 kawsachiwasqanchejrayku, mana urmajta saqewasqanchejraykutaj. 10 Diosniyku, Qan pruebaman churawarqayku. Qolqe metalta jina ch'uwachawarqayku. 11 Ch'ipapi urmachiwarqayku, uj jatun llakiytataj q'epirichiwarqayku. 12 Runasta kunkaykuman khapaykojta saqerqanki. Nina chawpita purerqayku, yaku chawpitataj, chaymantataj samarichiwarqayku. 13 Wasiykiman yaykuspa, uywa wañuchisqasta ñawpaqeykipi q'olachisaj. Ajinata junt'asaj imatachus ruwanayta nisusqayta, 14 mayqenkunatachus jatun llakiypi kashaspa parlarqani, chayta. 15 Wira uywasta ñak'aspa, altarniykipi q'olachisaj. Jaywasqayki torosta, chivosta, corderosta ima. 16 Diosta manchachikojkuna, tukuy jamuychej. Uyariychej, noqataj willasqaykichej imatachus noqarayku Pay ruwasqanta. 17 Simiywan Payta wajyakorqani, qalluywantaj Payta jatuncharqani. 18 Sichus sonqoypi sajrata waqaychayman karqa chayqa, Tata Dios manapuni uyariwanmanchu karqa. 19 Paytajrí uyariwan, tukuy mañakusqasniyta qonawampaj. 20 Diosqa yupaychasqa kachun. Mañakusqayta mana qhesachanchu, nitaj saqenchu munakuwaytapis.
