SALMOS 65

1Sionpa Diosnin, Qanqa yupaychanapaj jinapuni kanki. Runasqa junt'ananku tiyan imatachus ruwanankupaj nisusqankuta. 2Qan uyarinki mañakususqankuta. Tukuy runas Qanman jamunku. 3Sajra ruwasqasniyku atipashawajtiyku, contraykipi juchallisqaykuta Qan pampachapuwayku. 4Kusikuyniyojmin ajllakusqayki, qayllaykipi tiyakunampaj pusasqayki runaqa. Wasiykipi allin kaywan sajsachisqa kasqayku, santo Temploykipi kajwan. 5Salvawajniyku Dios, Qan kutichiwayku may sumaj t'ukuna cheqan imasta ruwaspa. Kay pachapi kaj chhika runasqa Qampi suyakunku, jinallataj aswan karu mama qocha kantupi tiyakojkunapis. 6Qanqa atiyniykiwan orqosta sayachinki, kallpawan chumpiykukuspa. 7Qanqa mama qochaj qhollchoqeyaspa wajtakusqanta thañichinki. Nacionespa ch'ajwasqankutapis ch'inyachinki. 8Karupi tiyakojkunapis kharkatinku, sumaj ruwasqasniykita rikuspa. Qanrayku kusikuywan qhaparinku inti llojsimuynejmanta, inti yaykuynejkama. 9Qanqa jallp'ata watukuspa, parachinki. Mayta qhapaj kayniykiwan kay pachata qhapajyachinki. Qanqa mayuspi yakusniykiwan trigostapis wiñachipunki, munayniykiman jina. 10Qan surk'usta yakuwan sajsachinki, k'urpastataj yakuwan chulluchispa, pampachanki. Ashkhata parachimuspa, jallp'ata jasayachinki, poqoyninmantaj bendicionta churaykunki. 11Qanqa watantinta bendicionwan junt'achinki, carretasniykipitaj phullchishan chay poqoykuna. 12Ch'in pampaspi pastoqa q'omerlla kashan, orqostaj may k'achituta t'ikarinku. 13Pampaspi uywasqa llump'irinku. Vallespi trigo chajraspis k'aywirinku. Tukuyninku takinku, kusikuspataj qhaparikunku.

will be added

X\