SALMOS 62

1Diosllapi almayqa ch'inllamanta suyakun. Salvasqa kayneyqa Paymanta jamun. 2Payllapuni pakakunay chhanka, salvawajniytaj. Mana urmasajchu, imaraykuchus Paymin noqapaj perqawan sumaj jark'achasqa wasi jina. 3Jayk'ajkamataj qankuna maqaykuwaj jamunkichejri, urmachiwaytataj munankichejri, ñak'ayllataña sayashaj perqata jina, chayrí phunusqa qenchapis kayman jina? 4Urmachillawaytapuni yuyanku; llullakuyta munakunku. Siminkuwan allinta parlapayawanku, sonqonkupitajrí maldeciwanku. 5Almáy, Diosllapi ch'inllamanta suyakuy. Suyakuyneyqa Paymanta jamun. 6Payllapuni pakakunay chhanka, salvawajniytaj. Mana urmasajchu, imaraykuchus Paymin noqapaj perqawan sumaj jark'achasqa wasi jina. 7Diosllamanta kashan salvasqa kanaypis, allimpaj qhawasqa kanaypis. Payllapuni pakakunay chhankaqa, waqaychawajniypis. 8Llajta masisníy, Paypipuni atienekuychej. Sonqoykichejpi kaj chhikata Payman willakuychej, imaraykuchus Diosmin jark'akuwajninchejqa. 9Runaqa qhasi manakajlla, wajcha runapis, qhapaj runapis kachun. Pesaspichus iskayninkuta pesasunman chayqa, wayramantapis aswan chhalla kankuman. 10Ama kallpapi atienekuychejchu. Suwasqa kajwanqa ama may kasqaykichejta yuyakuychejchu. Qhapajyaspapis, ama qolqeykichejpi sonqoykichejta churaychejchu. 11Uj kutita Dios parlarqa, chaytataj iskay kutita uyarini: Ateyqa Diospatamin. 12Qampata, Señorníy, khuyakuypis, imaraykuchus sapa runaman ruwasqanman jina t'inkata qopunki.

will be added

X\