SALMOS 58

1Qankuna atiyniyojkunaqa, cheqantachu parlankichej? Cheqan justiciatachu ruwankichej? 2Mana jinachu, astawanqa sajra imasta ruwayta yuyankichej; sonqoykichejpi sajra imasta wakichispa, makisniykichejwan runasta ñak'arichinkichej. 3Sajra runasqa mamankoj wijsanmantapacha sajra ñanta jap'irinku. Nacekusqankumantapacha llullata parlaspa, cheqan ñanmanta pantaykunku. 4Kataris jina venenoyoj kanku. Joq'araman tukoj katari jina kanku. 5Katariwan kasuchikojpa tonadasnintapis mana kasunchu, may sumaj yachaj kashajtimpis. 6Diosníy, kirusninkuta muchharay; chay león uñaspa jatun kaj kirusninkuta p'akiray. 7Jich'asqa yaku jina chinkachunku. Ñampi qhora jina ch'akichunku. 8Ch'uru llawsampi tukukun, ajinallatataj paykunapis tukukuchunku. Wañusqa sullu wawa jina ama k'anchayta rikuchunkuchu. 9Manaraj reparakushaspa, khishkas jina q'olaykuchunku. Q'omer qhora jinataj t'irasqa kachunku. 10Cheqan runaqa kusikonqa sajra runasta castigasqata rikuspa, chakisnintataj chay sajra runaspa yawarninkupi ch'aranchakonqa. 11Chaypachataj nenqa: Cheqan runapajqa t'inka kampuni, jinallataj Dios tiyan kay pachata juzganampaj.

will be added

X\