SALMOS 57

1Khuyakuway noqamanta, Diosníy. Khuyakullaway. Qan waqaychanawaykita mask'ani. Lijrasniyki urapi pakakuyta munani kay llakiy pasanankama. 2Patapi kaj Diosmanta mañakusaj, tukuy imapi yanapawaj Diosmanta. 3Payqa janaj pachamanta munakuyninta apachimuwanqa, cheqa kaynintawan. Phiñakuspa qhatiykachawajkunamantataj salvawanqa. 4Pampapi wijch'urayashani runa mikhu leones chawpipi. Kirusninkoqa t'ojsina lanzas jina, flechas jinataj kanku. Qallunkutaj filochasqa espada jina. 5Diosníy, Qanqa janaj pachamanta aswan patapi kanki, jatun kayniykej k'anchaynintaj tukuy kay pachaman junt'aykun. 6Enemigosneyqa uj ch'ipata purinayman churarqanku, noqaj kallpaytaj mana karqañachu. Ñan purinaypi uj t'oqota allarqanku, paykunallataj chayman urmaykunku. 7Sonqoyqa wakichisqa kashan, Diosníy, takiykunata takipusunaypaj. 8Rijch'ariy ari, almáy; rijch'ariy arpa, lira ima. Noqataj mosoj p'unchayta rijch'arisaj. 9Takiykunawan jatunchasqayki, Tata Dios, tukuy ayllus ukhupi, naciones ukhupi ima. 10Munakuyniykeqa janaj pachakama chayan, cheqa kayniykitaj phuyuskama chayan. 11Diosníy, janaj pachamanta aswan patapi kanki, jatun kayniykej k'anchaynintaj tukuy kay pachaman junt'aykun.

will be added

X\