SALMOS 56

1Khuyakuway noqamanta, Diosníy; runasqa qhatiykachashawanku oqoykunawankupaj jina. Sapa p'unchay contraypi jamuspa, ñak'arichiwanku. 2Enemigosniy tukuy p'unchay qhatiykachawanku. Ashkha kanku wapuykachaspa maqawajkunaqa. 3Manchachikuspa, Qanllapi atienekuni. 4Diospi atienekuni, nisqantataj jatunchani. Diospi atienekuni, manataj manchachikunichu. Imatataj runaqa ruwawanman kasqari? 5Tukuy p'unchay nisqasniyta q'ewinku. Contraypi sajrata ruwayllata yuyanku. 6Tantakuspa, kaypi jaqaypi pakaykarakunku; purisqayta allinta wateqawanku, mayk'ajchus wañuchinawankuta suyaspa. 7Sajra kayninkuman jina paykunaman kutichipuy. Diosníy, phiñakusqaykiwan chay nacionesta k'umuykachachiy. 8Qan yupashanki mashkha kutitachus ayqekusqayta; waqayniypa sapa sut'uyninta Qan botellapi jap'inki, chaytaj libroykipi qhelqasqa kashan. 9Enemigosneyqa ayqeyta qallarenqanku, noqa Qanmanta yanapata mañakojtiy. Noqa sumajta yachani Dios kutikuwasqanta. 10Diospi atienekuni, nisqantataj yupaychani. Diospi atienekuni, nisqantataj jatunchani. 11Diospi atienekuni, manataj manchachikunichu. Imatataj runaqa ruwawanman kasqari? 12Ruwasaj nisqasuyta junt'asqayki, Diosníy, agradecekuna jaywanastapis qollasqaykitaj, 13wañuymanta salvawasqaykirayku. Urmanaymantapis librawarqanki, kawsay k'anchaypi purinaypaj Diospa ñawpaqempi.

will be added

X\