1 Diosníy, uyariway mañakususqayta, qhawariway waqasqayta. 2 Qanman qhaparikamusqayta uyariway, Reyníy, Diosníy, imaraykuchus Qanmanta mañakuyki. 3 Tata Dios, sut'iyaymanta mañakusqayta uyariwanki. Chhapu chhaputa Qanman willakuyki, chantá suyani imatachus ninawaykita. 4 Qanqa mana sajra kajwan kusikoj Dioschu kanki; sajra runasqa Qanwan mana tiyakunkumanchu. 5 Jatunchakojkunaqa mana ñawpaqeykipi sayayta atinkumanchu; Qanqa chejnikunki sajrata tukuy ruwajkunata. 6 Qanqa llullasta t'ustirparinki; runa wañuchi wasanchajkunata Qanqa millachikunki. 7 Noqarí wasiykiman yaykuyta atini mayta munakuwasqaykirayku. Santo wasiyki qhawarisqa, Qanman tukuy sonqo k'umuykukuni. 8 Enemigosniyrayku, Tata Dios, cheqan kasqaykiman jina purichiway, cheqan ñanniykitataj pusaway. 9 Paykunaqa llullakullankupuni. Sonqonkupeqa sajrallata yuyanku. Tonqorinkoqa kicharisqa covacha jina; siminkupis llullallata parlan. 10 Diosníy, paykunata castigay wananankupaj; imatachus yuyasqankuta pantachiy. Anchata juchallikusqankurayku, ñawpaqeykimanta paykunata qharqoy, imaraykuchus contraykipi oqharikorqanku. 11 Kusikuchunku Qampi pakakojkuna; kusisqapuni kachunku Qan paykunata waqaychasqaykirayku, ajinamanta munakusojkunaqa Qanrayku kusikunankupaj. 12 Tata Dios, Qanqa bendecinki cheqan ruwajta. Munakuyniykeqa jark'akuna jina payta waqaychan.
