1 Kayta allinta uyariychej, tukuy llajtas, tukuy kay pachapi kaj runas, pisi yachayniyojkuna, yachayniyojkuna, qhapajkuna, wajchas ima. 3 Noqa yachaywan parlasaj. Sonqoy ukhupi yuyasqayta yachaywan willasaj. 4 Sumajta uyarisaj jatun yuyaywan nisqasta; sonqoypi pakasqa kajta arpaj waqayninwan sut'inchasaj. 5 Imaraykutaj manchachikuyman kasqa, sajra p'unchaykuna jamojtin, enemigosniypa sajra ruwayninku muyuykuwajtin? 6 Paykuna qhapaj kayninkupi atienekunku, ashkha kapuyninkumantataj runaykachanku. 7 Chaywampis, mana pipis pagaspa wawqenta salvayta atinmanchu, nitaj Diosman pagayta atinmanchu kawsayninta salvanampajqa. 8 Mana jayk'ajpis qolqe wakinmanchu runaj kawsayninta rantinapajqa, 9 wiñaypaj kawsanallampajpuni, wañuyta mana rikuspa. 10 Kayta yachanchej: Tukuypis uj rejllata wañunku, yachayniyojkunapis, wampuspis. Kapuyninkutaj wajkunapaj qhepakapun. 11 Jallp'asninkumampis sutisninkuta churanku. Chaywampis covachasninkoqa wiñaypaj wasinku kanqa, chaypitaj wiñaypaj qhepakonqanku. 12 Runaqa may jina qhapajpis, tukukuyniyojpuni. Uywa jinallataj wañupun. 13 Ajina tukukunku paykunallapi atienekojkunaqa. Ajinapi tukukunku paykunallamanta runaykachajkunaqa. 14 Chay runasta, wañoyqa michejpis kanman jina ukhu pachaman pusan, ovejaspis kankuman jinata. Sut'iyamojtintaj, cheqan runasqa paykunata kamachenqanku. Sajra runaspa allin kayninkoqa tukukaponqa, ukhu pachataj wasinku kaponqa. 15 Noqatarí Diosqa ukhu pachaj atiyninmanta librawanqa, imaraykuchus Payqa pusakapuwanqa. 16 Pipis qhapajyajtenqa, ama qan uj jinayaychu, aswan k'achituman wasinta tukuchejtimpis. 17 Wañuspaqa, mana imatapis apanqachu, nitaj k'acha kapuynimpis ukhu pachaman qhepanta renqachu. 18 Kawsashaspa kusisqapis kachun, qhapaj kasqanrayku runas may k'achata parlajtinkupis, 19 uj p'unchay payman wañuy chayamonqa, manañataj kawsay k'anchayta ujtawan rikonqachu. 20 Runaqa allimpaj qhawasqa kashaspapis mana yuyayniyoj kanman chayqa, wañoj uywallaman rijch'akun.
