SALMOS 45

1K'acha simi nisqaswan sonqoyqa junt'a kashan. Reyniypa ñawpaqempi yarawiyta takirikusaj. Sumaj qhelqaj lapiznin jina takirisqayqa kashan. 2Qanqa tukuy runasmanta aswan alajitu kanki. Simiykimanta misk'i parlay t'ojyarimun. Chayrayku Diosninchej wiñaypaj bendecisunki. 3Wapu runa, espadaykita chumpiykiman churay, may atiyniyoj kayniykipi. 4Wapu kayniykiwan ñawpajman riy, kay imasrayku maqanakuspa: Cheqa kajrayku, llamp'u sonqo kajrayku, cheqan kajrayku ima. Paña makiykitaj jatuchaj imasta ruwasqanta rikuchisonqa. 5Reyníy, llajtasqa chakisniykiman urmanku. Flechasniykeqa filos kanku, enemigosniykej sonqonkumantaj sat'iykukunku. 6Kamachina tiyanaykeqa, Diosníy, wiñaypa wiñaynintimpaj. Kamachisqaykeqa cheqan kayman jina. 7Cheqan kajta munakunki, sajra kajtataj chejnikunki. Chayrayku Dios ajllakusunki kawsaqesniyki ukhumanta, Diosniykitaj kusiywan junt'achisunki, aceitewampis jawisunkiman jina. 8P'achaykeqa canelaman, mirraman, aloeman ima munayta q'aparishan. May valorniyoj marfil tulluwan k'achanchasqa kamachina wasipi tocaykunawan kusichisunku. 9Reyespa ususisninku muyuykusunku. Kamachina tiyanaykej pañampitaj reina kashan Ofirmanta qoriwan k'achanchasqa. 10Uyariway, ususitáy; kasuy imatachus nisusqayta: Qonqapuy familiaykita, llajtaykitawan. 11Reyqa munasonqa k'achita kasqaykirayku; payqa wiraqochiyki, chayrayku payta kasunayki tiyan. 12Tiromanta sipaskuna k'acha imasta apampusonqanku. Llajtamanta aswan qhapajkunapis allin ñawiwan paykunata qhawarinaykita munanqanku. 13May k'achitapuni reypa ususin yaykumushan. P'achanqa qoriwan awakipasqa, k'achanchasqataj. 14May sumaj p'achallisqata reyman payta pusaykonqanku sipas masisnintawan khuskata. 15Sumaj kusiywan paykunata pusamunku, reypa kamachinan wasimantaj may kusisqa yaykunku. 16Reyníy, churisniykeqa ñawpa tatasniykej cuentampi tiyaykonqanku. Paykunata qan churanki tukuy kay pachapi kamachinankupaj. 17Noqa sutiykita yuyarichillasajpuni wiñaypaj, tukuy llajtaspitaj wiñaypaj jatunchasonqanku.

will be added

X\