SALMOS 44

1Diosníy, ninrisniykuwan uyariyku tatasniykoj siminkumanta, unay watas paykuna kawsashajtinku imastachus ruwasqasniykimanta. 2Qanqa makiykiwan wijch'orqanki mana Qampi yuyaj runasta. Waj nacionesta k'umuykucherqanki, tatasniykutataj chayman churarqanki tiyakunankupaj. 3Manamin makinkuwanchu nitaj espadankuwanchu paykunaqa jallp'ata jap'ikaporqanku. Manachayqa Qampa atiyniyki, kallpayki, chaypi kasqaykej k'anchaynin ima tatasniykuta atipayta yanaparqa, paykunata munakusqaykirayku. 4Qan Diosníy, Reyniy kanki; Jacobpa mirayninta yanaparqanki atipanankupaj. 5Qanrayku enemigosniykuta atiparqayku. Noqaykuta chejnikojkunata sutiykipi t'ustita ruwarqayku. 6Noqaqa mana armasniypichu atienekuyman, manallataj espadaywanchu wajkunata atipayman. 7Qanmin enemigosniykutaqa atipayta yanapawarqayku. Chejnikuwayku, chaykunataqa Qanmin p'enqayman churarqanki. 8Tata Dios, Qanrayku sapa p'unchay umaykuta oqhariyku, Qan Diosniykutataj wiñaypaj yupaychasqayku. 9Qanrí qhesachawayku; p'enqaypi rikhurichiwayku, manañataj soldadosniykuwampis llojsinkichu. 10Enemigosniykuwan ayqechiwayku. Chejnikuwayku, chaykunaqa suwawayku, imaykutapis munasqankuta apakapunku. 11Qanqa jaywawarqayku, wañuchinapaj ovejaspis kaykuman jina, ch'eqerachiwarqaykutaj Diospi mana creej naciones ukhuman. 12Yanqhallata aylluykitaqa venderparinki, vendespataj ni imatapis jap'inkichu. 13Runas toreyanawaykupaj jina Qan churawarqayku, muyuyniykupi kajkuna asipayanawaykupaj, p'enqaypitaj qhawachinawaykupaj. 14Diospi mana creejkunaj asipayananta ruwawarqayku. Noqaykuta rikuspa, alqochakuwayku, umankuta thalarispa. 15Sapa p'unchay k'umuykachachisqallapuni kakuni. P'enqaywan mana maymampis uyayta churayta atinichu, 16enemigoypa juchanrayku, pay qhesachawasqanrayku, jatunmanta qhapariwasqanrayku, phiñakuspa qhasimanta ch'ataykuwasqanraykutaj. 17Chay tukuy imas jamuwarqayku chaypis, mana Qanmanta qonqakorqaykuchu, nitaj tratoykita p'akerqaykuchu. 18Mana sonqosniyku Qanmanta karunchakorqachu, nitaj chakisniyku ñankunaykimanta ladoyarqachu. 19Chaywampis, Qanqa ch'in q'ara pampapi ñat'urpariwayku, wañuy llanthuwantaj qhataykuwayku. 20Qan Diosniykutachus qonqaykuman karqa, waj dioskunatatajchus yupaychaykuman karqa chayqa, 21Qanqa chayta yachawajpuni karqa, imaraykuchus Qanqa sonqoyku ukhupi pakasqa kajtapis yachankipuni. 22Qanraykutaj sapa p'unchay wañuchisqa kayku; ñak'anapaj ovejasta jina qhawawayku. 23Rijch'ariy ari; imaraykutaj puñullanki, Tata Dios? Rijch'ariy ari. Ama wiñaypajqa qhesachawaykuchu. 24Imaraykutaj uyaykita pakawayku? Imaraykutaj qonqapunki phutikuyniykumanta, chhikatapuni ñak'ariypi mat'isqa kasqaykumantari? 25Pampakama last'asqa kashayku, cuerpoykutaj pampata qharastakushan. 26Tata Dios, sayarikuy yanaparinawaykupaj. Munakuyniykipi khuyakuyniykirayku salvawayku.

will be added

X\