SALMOS 42

1Imaynatachus tarukaqa yakumanta ch'akichikuspa, p'itikoj jina yaku mayuta mask'an, ajinata, Diosníy, Qantaqa mask'ayki. 2Kawsaj Diosmanta ch'akichikuni. Mayk'ajtaj Diospa ñawpaqenman risaj yupaychanaypajri? 3Mikhunaytaj, ujyanaytajqa waqaynillay tuta p'unchay, runastaj sapa rato tapushawanku: Maytaj Diosniykiri? nispa. 4Chay imasmanta yuyarikuspa, llakiywan atipachikuni. Yuyarikuni imaynatachus ashkha runaswan khuska Diospa Templonman rishaspa, paykunata pusasqayta kusiywan qhaparispa, yupaychaspa ima; chaypachamá jatun fiesta karqaqa. 5Imaraykutaj q'enaqakuyman kasqari? Imaraykutaj phutikuyman kasqari? Diospi suyakuyniyta churani, Paytataj yupaychasajraj. Paymin Salvawaj Diosneyqa. 6Ukhuypi almayqa may llakisqa kashan. Chayrayku Qanmanta yuyarikusaj, Jordán Mayumantapacha, Hermón, Mizar Orqomantapachataj. 7Ukhu wayq'ospi yakoj phajchasqan sinch'ita uyarikun kay chimpaman, jaqay chimpaman; ashkha mayu yakusta apachimusqayki patayta wasaykun. 8Chaywampis, Tata Diosqa khuyakuyninta p'unchaypi chayachimuwan. Tutanrí Tata Diosman takillasajpuni, mañakullasajpunitaj kawsachiwaj Diosniymanta. 9Jark'akuwaj Diosniyta nisaj: Imaraykutaj qonqawankiri? Imaraykutaj llakisqa purinay tiyan enemigosniypa sarusqanri? 10Tullusniypis nanawanña enemigosniy toreyawasqankumanta. Tapullawankupuni: Maytaj Diosniykiri? nispa. 11Imaraykutaj q'enaqakuyman kasqari? Imaraykutaj phutikuyman kasqari? Diospi suyakuyniyta churani, Paytataj yupaychasajraj. Paymin Salvawaj Diosneyqa.

will be added

X\