SALMOS 41

1Kusikuyniyojmin mana kallpayoj wajchapi yuyajqa. Tata Diosqa payta libranqa, llakiy p'unchay chayamojtin. 2Tata Diosmin paytaqa waqaychanqa; kay pachapi kusiyta, kawsaytataj qospa, mana enemigosnimpa munayninkumanqa saqenqachu. 3Tata Diosqa payta onqoynimpi kallpachanqa. Onqoyninmanta sanoyachiponqa. 4Noqa nerqani: Tata Dios, khuyakuway, sanoyachiway, imaraykuchus contraykipi juchallikorqani. 5Enemigosneyqa noqapaj mana allin kajta munanku: Mayk'ajtaj wañonqa, sutintaj chinkasqa kanqa? nispa. 6Watukuwaj jamuwanku chaypis, mana tukuy sonqochu jamuwanku. Tukuy ima sajra kajta sonqonkupi waqaychanku. Jawaman llojsispataj, chayta junt'achimunku. 7Chejnikuwajkunaqa tukuyninku tantakuspa, noqamanta thutunku; contraypi sajra kajta yuyanku: 8Kayqa Supaypa onqochisqan; kunanqa manaña puñunanmanta sayarenqañachu, nispa. 9Sumaj kaj kawsaqeypis, atienekusqay kaj, pichus noqawan mikhoj, chayqa wasanchawan. 10Qanrí, Tata Dios, khuyaway, sayarichillaway ari ruwawasqankuman jina kutichinaypaj. 11Chaypi yachasaj Qanta kusichisusqayta, enemigoy atipawasqanmanta ama kusipayanawampaj. 12Noqatarí llimphu kawsayniyman jina sayachiwanki; ñawpaqeykipipuni wiñaypaj waqaychakuwanki. 13Yupaychasqa kachun Israelpa Señornin Tata Dios wiñaypa wiñaynintimpaj. Jinapuni kachun.

will be added

X\