1 Tata Diospi tukuy sonqo suyakorqani. Paytaj kutirikamuspa, qhaparikusqayta uyariwarqa. 2 Wañuy t'oqomanta orqhowarqa. T'urupi chinkaykunaymanta sinch'ita sayachiwarqa uj chhanka patapi. Chakisniytataj kallpacharqa thuruta sayanaypaj. 3 Simiymanta uj mosoj takiyta llojsicherqa, Diosninchejta yupaychana takiyta. Ashkha runas chayta rikuspa, manchachikonqanku, Tata Diospitaj atienekonqanku. 4 Kusikuyniyojmin Tata Diospi atienekoj runaqa, pichus wapuykachaj runapi ñawisninta mana churanchu nitaj llulleriospa qhepanta rejkunapipis, chay. 5 Señor Tata Diosníy, ashkha t'ukuna imasta noqaykupaj ruwarqanki, maytataj noqaykumanta yuyarikuwayku. Ni imapis Qanwanqa ninakunchu. Sichus chaykunamanta willayman, parlaymantaj chayqa, mana tukuchiyta atiymanchu. 6 Qanqa mana munankichu uywa wañuchisqa q'olachinasta, nitaj ch'aki mikhuy jaywanastapis. Mana mañankichu uywa wañuchisqa q'olachisqasta, nitaj jucharayku uywa wañuchisqa q'olachinastapis. Astawampis ninrisniyta kicharispa, uyarichiwarqanki. 7 Chayrayku nerqani: Kaypi kashani, nispa, Diosmanta Qhelqasqapi nisqanman jina: 8 Diosníy, tukuy sonqo munayniykita ruwayta munani. Yachachiwasqasniykita sonqoypi waqaychani, nispa. 9 Jatun tantakuypi cheqan kayniykimanta willarqani. Qan, Tata Dios, sumajta yachanki, mana ch'in kakusqayta. 10 Cheqan kayniykimantaqa manapuni sonqoypi pakanichu; cheqan sonqo kasqaykimanta, salvacionniykimantawan parlarqani. Cheqa kayniykita, khuyakuyniykitawan manallataj pakarqanichu jatun tantakuypi. 11 Qantaj, Tata Dios, khuyakuyniykita ama qhechuwaychu; munakuyniykiwan, cheqa kayniykiwan ima wiñaypaj waqaychaway. 12 Mana yupay atina may chhika llakiykuna muyuykuwanku. Sajra ruwasqasniy taripaykuwan; niña qhawariytapis atiniñachu. Juchasneyqa chujchasniymantapis aswan ashkha kanku; kallpaypis manaña kanchu. 13 Tata Dios, jamuspa libraway ari; Tata Dios, usqhayta jamuy yanapanawaykipaj. 14 Wañuchiyta munawajkunaqa p'enqaypi rikhurichunku. Sajrata ruwayta munawajkunapis p'enqayta k'umuykachachisqa kachunku. 15 P'enqaywan tukuchisqa kachunku noqamanta tukuy alqochakuwajkunaqa. 16 Qanta mask'ajkunarí kusikuywan junt'asqa kachunku. Salvacionniykita munakojkunataj nillachunkupuni: Tata Diosqa jatunchasqa kachun, nispa. 17 Noqa wajcha, llakisqataj kani; ama qonqawaychu Señor. Qanmin yanapawaj, salvawajtaj kanki. Ama suyachikuychu, Diosníy.
