SALMOS 38

1Tata Dios, phiñasqa kaspa ama k'amiwaychu, nitaj castigawaychu phiñakuyniykipi. 2Flechasniyki noqata t'ojsiykuwanku, makiykitaj maqawan. 3Juchasniyrayku phiñakojtiyki, tukuy cuerpoy onqosqa kashan. Mana uj tullullaypis sano kanchu. 4Tukuy sajra kayniy ñat'ushawan. Uj llasa q'epita jina mana apayta atinichu. 5Wampuyasqayrayku nanasqasniy q'eyacharan, asnarantaj. 6K'umuykachaspalla umphupacha purini, tukuy p'unchaypis llakisqalla kani. 7K'aja onqoywan wasayqa k'ajarishan. Tukuy cuerpoyqa onqosqa kashan. 8Mana kallpayoj tukuy ukhuy t'una kashan. Sonqoy wawayasqanmanta waqani. 9Señor, Qan yachanki tukuy munasqayta. Ukhu samasqaypis Qampajqa mana pakasqachu. 10Sonqoyqa phataj jinaña kashan, kallpaytaj pisiyarparin, ñawisniypis chharpuyapun. 11Sumaj kawsaqesniy, ayllusniy kajkunapis mana chayamuwankuchu; karullapi kashanku sonqoymanta. 12Wañuchiwayta munajkunaqa tojllata churawanku. Mana allin kayniyta munajkunaqa contrayta parlanku; sapa kutilla wasanchanawankupaj wakichikunku. 13Noqarí mana uyarej tukuni, joq'arapis kayman jina. Opapis kayman jina, mana simiyta kicharinichu. 14Joq'ara jina kani, ni imata kutichikunichu. 15Noqaqa Qampi suyakuni, Señor Tata Diosníy. Paykunamanrí Qanlla kutichiy. 16Noqaqa nerqani: Urmajtiy, ama asikuchunkuchu, nitaj kusipayawachunkuchu, nispa. 17Cheqamanta urmaj jinaña kashani. Nanayneyqa manapuni chinkanchu. 18Chayrayku juchasniyta willakusaj; chay juchasniyrayku llakikuni. 19Enemigosneyqa noqamanta aswan kallpayoj kanku. Mana imallamanta chejnikuwajkunaqa ashkhayaykunku. 20Allin ruwasqaymanta sajrata kutichiwanku; allin kajta mask'asqaymanta contraypi churakunku. 21Tata Dios, ama sapitayta saqerpariwaychu. Diosníy, noqamanta ama karunchakuychu. 22Diosníy, salvawajníy, usqhayllata jamuspa, yanapaway.

will be added

X\