1 Ama phiñakuychu sajrata ruwajkunarayku, amataj envidiakuychu sajrata ruwajkunamanta. 2 Paykunaqa ichhu jina usqhayllata ch'akinku, qhora jinallataj qawinku. 3 Tata Diospi atienekuy, allin kajtataj ruway. Kay jallp'api kawsakuy, Tata Diosta ni jayk'aj wasanchaspa. 4 Tata Diosta munakuspa mayta kusikuy, Paytaj sonqoykej munasqanta qosonqa. 5 Tata Diospa makisninman kawsayniykita churay. Paypi atienekuy, Paytaj yanapasonqa. 6 Cheqan kayniykita, cheqan ruwasqaykitawan chawpi p'unchaypi inti k'anchan, ajinata k'ancharichenqa. 7 Ch'inlla kakuy Tata Diospa ñawpaqempi. Suyakuy pacienciawan Pay yanapanasunta. Ama phiñakuychu pitapis allin risqanrayku, nitaj sajrata wakichikojkunamantapis. 8 Phiñasqa kayta saqey, qhesachaytaj; amapuni phiñakuychu, imaraykuchus chaywanqa aswan mana allinman chayanki. 9 Sajra runasqa kay jallp'amanta chinkachisqa kanqanku. Tata Diospi suyakojkunarí kay pachata herenciapaj jap'enqanku. 10 Tumpamantawanqa manaña sajra runas kanqankuchu; may jinata mask'aspapis, manaña paykunata tarinkiñachu. 11 Llamp'u sonqoyojkunatajrí kay pachata herenciata jina jap'enqanku, allin kawsaypitaj kusisqa kanqanku. 12 Juchasapaqa cheqan runaj contrampi sajra imasta wakichin, chejnikuywantaj rikuyta mana atinchu. 13 Tata Diostajrí juchasapamanta asiykukun, imaraykuchus yachan sajrapajqa horan chayamunantaña. 14 Sajra runasqa espadankuta orqhokunku, flechankutataj wakichinku urmachinankupaj, wañuchinankupajtaj wajchasta, llamp'u sonqoyojkunata, allin kawsayniyoj runastawan. 15 Chay espadarí paykunaj sonqollankutataj t'ojsiykonqa, flechasninkutaj p'akirakonqa. 16 Cheqan runaj pisi kapuynenqa aswan allin, qhapaj sajra runaj ashkha kapuyninmanta nisqaqa. 17 Tata Diosqa sajra kajkunata tukuchenqa, allin runastatajrí sumajta sayachenqa. 18 Mana juchayoj kawsajkunata Tata Diosqa waqaychan. Paykunaj herenciankoqa wiñaypaj kanqa. 19 Sajra p'unchaypi mana p'enqachisqachu kanqanku; yarqhay kajtintaj, sajsachisqa kanqanku. 20 Sajra runasqa ch'aki qhora jina larwanqanku. Tata Diospa enemigosnimpis q'oshñi jina chinkanqanku. 21 Sajra runaqa manukuspapis, mana qopunchu, allin runarí khuyaspa tukuy sonqo jaywarin. 22 Mayqenkunatachus Tata Dios bendecin, chaykunaqa kay pachata herenciapaj jap'enqanku. Pikunatachus maldecin, chaykunaqa chinkarparichisqa kanqanku. 23 Tata Diosqa runa maynintachus purinanta rikuchin, Paypa munasqan ñanmantaj churan. 24 Runaqa urmaspapis, mana urmasqachu qhepakonqa, imaraykuchus Tata Diosqa makinmanta jap'in. 25 Noqa wayna karqani, kunantaj machuña kani; ni jayk'ajpis k'acha runataqa wijch'usqata rikorqanichu, nitaj wawasnintapis khuyayta mañakojtaqa. 26 Khuyakullampuni payqa, imatapis mañarillampuni, wawasnintaj bendición kanku. 27 Sajra kajmanta karunchakuy, allin kajtapuni ruway, wiñaypajtaj kawsakunki. 28 Tata Diosqa cheqan kajta munakun, manataj qonqapunchu Paypaj t'aqasqa kajkunamanta; sajra runastarí Payqa tukuchin mana wawasniyojta. 29 Cheqan runasqa kay pachata herenciankupaj jap'enqanku, chaypitaj wiñaypaj kawsanqanku. 30 Cheqan runaqa yachaywan parlan. Allin runapis cheqanta parlan. 31 Diospa leynenqa sonqompi kashan; ni jayk'ajpis chakisnin misk'anqachu. 32 Sajra runaqa cheqan runata wateqan, wañuchiyta munaspa. 33 Tata Diostajrí mana munanqachu paypa makisnimpi urmananta, nitaj saqenqachu pikunapis juchachanankuta. 34 Tata Diosta kasuy, Paypi suyakuy, Paytaj jatunchasonqa, kay pachata herenciapaj qosonqa. Ñawisniykiwan rikunki sajra runaspa urmasqankuta. 35 Sajra runata rikuni, jatun sach'a jina sinch'ita sayasqanrayku mayta wapuykachajta. 36 Chantá ujllata chinkaporqa. Mask'arqani, manataj tarerqanichu. 37 Cheqan runata, llimphu kawsayniyoj runatawan reparay; paypajqa allin kawsay kanqa. 38 Mana kasukoj runasrí pampachasqa kanqanku, juchasapastaj tukuchisqa kanqanku. 39 Cheqan runaspaj salvacionqa jamun Tata Diosmanta. Llakiy tiempopi Paymin jark'akojninkoqa. 40 Tata Diostaj mana allin kajmanta llusp'iyta yanapan. Sajra runasmanta ayqechispa, chay cheqan runasta salvan, imaraykuchus Paypi pakakuyta mask'arqanku.
