SALMOS 36

1Sajraqa juchasapaj sonqon ukhuman parlan. Payqa ni jayk'ajpis yuyarinchu Diosta manchachikuna kasqanta. 2Payqa yuyakun sumaj runa kasqanta, juchasnin mana chejnina kasqanta ima. 3Payqa khuchi simi, llullataj. Sumaj yuyayta qhesachaspa, manaña allin kajta ruwanchu. 4Puñunampi winkuspa, sajrata ruwanampaj yuyaynimpi wakichikun. Sajra ñannimpi kayta munampuni, manataj sajra kajta saqeyta munanchu. 5Tata Dios, khuyakuyniykeqa janaj pachakama chayan. Phuyuskamapis chayan cheqa kayniykeqa. 6Cheqan kayniykeqa jatun orqos jina, juzgaspa nisqaykitaj mama qocha jina ukhu. Qan Tata Dios, waqaychanki tukuy runasta, jinallataj uywastapis. 7May sumajpuni munakuyniykeqa, Tata Dios. Runasqa lijrasniyki urapi pakakuyta mask'anku. 8Wasiykipi ashkha mikhunawan paykunaqa sajsakunku, misk'i yaku mayumantataj paykunata ujyachinki. 9Qampi kawsay yaku juturi kashan. K'anchayniykipitaj k'anchayta rikuyta atiyku. 10Rejsisojkunaman munakuyniykita jayway, cheqan kayniykitataj cheqan sonqoyojkunaman rikuchiy. 11Ama saqeychu uma oqharejkuna sarunawankuta, nitaj sajra ruwajkunapis imananawankuta. 12Qhawaychej imaynatachus sajrata ruwajkuna urmanku, chayta. Paykunaqa ujtawan mana sayariyniyojta urmanku.

will be added

X\