SALMOS 33

1Tata Diosta yupaychaychej, k'acha runas; k'acha runaspa yupaychasqankoqa may sumajpuni. 2Arpapi takispa, Tata Diosman graciasta qoychej, lira nisqa tocanapipis takillaychejtaj. 3Mosoj takiyta Payman takiychej. Kusiywan k'achituta tocarispa takiychej. 4Tata Diospa nisqanqa cheqampuni. Ruwasqasnenqa rikuchiwanchej cheqan kayninta. 5Tata Diosqa cheqan kajta, justiciatawan munakun. Khuyakuyninwan tukuy kay pacha junt'a kashan. 6Cielota, tukuy chaypi kajtapis Tata Diosqa nisqanwan ruwarqa, simimpa samayninwan imalla. 7Payqa jatun qocha yakusta ujllaman tantaykun, mama qocha yakustapis ujllapi jallch'an. 8Kay pachapi tukuy kajkuna, Tata Diosta manchachikuychej; kay pachapi tukuy kawsajkuna, Payta manchachikuychej. 9Pay parlarqa, tukuy imataj ruwakorqa. Pay kamacherqa, tukuy imataj sinch'ita sayarqa. 10Tata Diosqa nacionespa ruwayta munasqankuta manakajman tukuchin. 11Tata Diospa ruway munasqantajrí wiñaypaj sayan, sonqompa yuyasqampis wiñay wiñaypaj. 12Uj nacionqa kusikuyniyojmin, Tata Diosqa Diosnin kajtin. Chay aylluta Pay ajllakun, Paypata kanampaj. 13Janaj pachamanta qhawamuspa, Tata Diosqa tukuy runasta rikun. 14Maypichus tiyakun, chaymantapacha Pay qhawamun kay pachapi tukuy kawsajkunata. 15Payqa sonqonkuta ruwarqa. Payllataj allinta qhawan tukuy ruwasqasninkuta. 16Ni mayqen reypis soldadosnillanwanqa salvakunmanchu, nitaj wapu runapis kallpallanwanqa. 17Caballosllaqa mana pitapis salvankumanchu; may jina kallpayoj kashaspapis, manapuni atinkumanchu pitapis salvayta. 18Tata Diosqa waqaychampuni Payta manchachikojkunata, munakuynimpi atienekojkunatapis. 19Wañuymanta salvan, yarqhay tiempopitaj mikhuchin. 20Noqanchejqa Tata Diospi atienekunchej. Paymin yanapawanchej, jark'akuwanchejtaj. 21Chayrayku sonqonchejqa Tata Diospi kusikun, santo sutimpitaj tukuy sonqo atienekunchej. 22Munakuyniyki, Tata Dios, noqaykuwan kachun, Qampi suyakusqaykuman jina.

will be added

X\