1 Tata Dios, Qampi atienekuni, ama ni jayk'aj p'enqachisqa kasajchu; cheqan kayniykipi libraway. 2 Uyaririllaway; usqhayllata libraway. Qan noqapaj jark'akuwaj chhanka jina kay ari. Salvakunay sinch'i jark'achasqa wasiy kay. 3 Qan kanki chhankay, jark'achasqa wasiytaj. Sutiykirayku ñanniykita pusawanki, waqaychawankitaj. 4 Pakaypi tojllata churawasqankumanta orqhoway. Qanmin pakakunayqa kanki. 5 Makisniykiman almayta churani. Kacharichiway, cheqa Señor Tata Diosníy. 6 Qhasi manakaj lanti yupaychajkunata chejnikuni. Noqaqa Tata Diosllapi atienekuni. 7 Khuyakuyniykipi maytapuni kusikusaj. Qan rikunki llakiyniyta, yachankitaj phutikuyniyta. 8 Mana enemigosniypa makisninkuman jaywaykuwarqankichu; Qan sinch'ita chakisniyta pampapi sayacherqanki. 9 Tata Dios, noqamanta khuyakuway, imaraykuchus phutiypi kashani. Llakiywan waqasqaypi ñawisniy chharpuyanña; tukuy cuerpoypis, tukuy kayniypis sayk'unña. 10 Llakikusqay waqasqaywan tukuy cuerpoy llawch'iyapun, kawsayniytaj tukukapushan. Juchayqa kallpayta tukuchin, tukuy cuerpoytaj llawch'iyapushan. 11 Tukuy enemigosniypa kusipayananku kani. Runa masiypa asikunan kani. Rejsiwajkunataj noqamanta ayqekuwanku. Callepi rikuwajkunapis ayqellankutaj. 12 Noqamanta qonqasqatapuni qonqapuwanku, wañusqañapis kayman jina; yuru p'akisqa jina kani. 13 Runas chhichinakusqankuta uyarishani. Tukuynejpi manchachikuylla tiyan noqapajqa. Uj runa jinalla contraypi oqharikunku, wañuchinawankupajtaj wakichikunku. 14 Chaywampis, Tata Dios, noqaqa Qampi atienekuni: Qanmin Diosniy kanki, nispa. 15 Kawsayniyta makiykiman churani. Chejnikuywan qhatiykachawaj enemigosniymanta libraway. 16 Khuyakuyniykiwan qhaway kay kamachiykita. Munakuyniykirayku salvaway. 17 Qanta qhaparikamuyki, Tata Dios. Ama p'enqayman churawaychu. Manachayqa sajra runasta p'enqaypi rikhurichiy, ukhu pachamantaj paykunata chinkaykuchiy. 18 Ch'inyachunku llulla simi runas, pikunachus alqochakuspa, pisipaj qhawanku cheqan runataqa, chaykuna. 19 Jatunchasojkunapaj may jatunmin munakuyniykeqa; sumaj waqaychasqa qolqeta jina paykunapaj jallch'anki. Chantá runaj rikunanta, Qampi atienekojkunaman qonki. 20 Qan paykunata waqaychanki, sajra runas millay ruwayta munajkunamantataj libranki; wasiyki ukhupi paykunata pakaykunki enemigosninkoj alqochakuyninkumanta. 21 Jatunchasqa kachun Tata Diosqa, imaraykuchus munakuyninwan jatuchaj imasta ruwapuwarqa, noqa llakisqa, phutisqataj kashajtiy. 22 Mana imanakuyta atispa, nerqani: Tata Diosqa wijch'uwanchá, nispa. Yanapanawaykita mañakusojtiytajrí, qhaparikusqayta Qan uyariwarqanki. 23 Tata Diosta munakuychej, Paypata kajkuna. Cheqan sonqoyojkunata Tata Diosqa waqaychan. Wapuykachajkunamantajrí sajra ruwasqankuman jina astawanraj qoponqa. 24 Sonqochakuychej kallpachakuychejtaj, Tata Diospi tukuy suyakojkuna.
