1 Tata Dios, noqa jatunchasqayki, Qanqa oqhariwasqaykirayku, enemigosniy asipayanawankuta mana saqesqaykirayku. 2 Señor Tata Diosníy, yanapayniykita mañakorqayki, Qantaj jampiykuwarqanki. 3 Qan Tata Dios, wañuymanta salvawarqanki; jallp'aj sonqonman yaykunaymanta librawarqanki. 4 Qankuna, Tata Diosta qhatikojkuna, Payman takiychej. Santo kayninta yuyarikuspa, yupaychaychej. 5 Phiñakuynenqa uj ratollapaj, k'acha kaynintajrí tukuy tiempopaj. Tutan waqasunman chaypis, sut'iyayta kusiy jamonqa. 6 Allimpi kawsakushaspa, kayta nerqani: Ni jayk'aj imapis urmachiwanqachu, nispa. 7 Qan, Tata Dios, k'acha khuyakuyniykiwan sinch'ita sayachiwarqanki. Manaña yanapawajtiyki, manchachikuy jamuwan, nitaj ni imata ruwayta atinichu. 8 Tata Dios, Qanman qhaparikamusaj, Qanmanta mañakusaj, Tata Dios. 9 Noqachus wañuyman chayqa, ima allintaj kanman? P'ampaykuwajtinku, imatataj tariyman? Ñut'u jallp'aqa yupaychasunkimanchu? Cheqa kayniykimantapis parlanmanchu? 10 Tata Dios, uyariway, khuyariwaytaj. Tata Dios, yanaparillaway ari. 11 Llakiyniyta kusiyman tukuchinki. Qhashqa p'achata orqhowaspa, kusiywan p'achallichiwanki. 12 Chayrayku, Señor Tata Diosníy, mana ch'in kayta atiymanchu. Graciasta qosuspa, takisajpuni wiñaypaj wiñaynintinkama.
