1 Tata Diosqa k'anchawajniy, salvawajniytaj. Pimantataj manchachikuymanri? Tata Diosqa kawsayniyta waqaychan. Pimantataj kharkasajri? 2 Maypachachus sajra runas, enemigosniy ima contraypi jamunku oqoykuwayta munaspa chaypacha, paykunallataj misk'aspa urmanku. 3 Uj tropa soldadospis muyuykuwachunku; sonqoyqa mana manchachikonqachu. Contraypipis sayarichunku waykhaykunawankupaj; noqaqa kakullasaj Diospi atienekuspa. 4 Ujllata Tata Diosmanta mañakuni, chayllatataj mask'asaj; Tata Diospa wasimpi kakuyllatapuni munani tukuy kawsayniypi, may k'acha kasqanta t'ukuspa qhawanaypaj. 5 Llakiykuna jamojtin, Tata Diosqa waqaychawanqa. Templon ukhupi pakawanqa, chhanka patamantaj salvasqata churawanqa. 6 Ajinamanta Tata Dios umayta oqharenqa, muyuynimpi kashanku, chay enemigosniypa patampi. Ajinata Templompi uywa wañuchisqasta Tata Diosman jaywasaj, kusiywan qhaparispa. Tata Diosta yupaychaspa, takisaj. 7 Qanta qhaparikamuyki, Tata Dios; uyarillaway. Noqamanta khuyakuspa, uyariway. 8 Sonqoyqa niwan: Tata Diosta mask'ay, nispa, noqatajrí Qanta mask'ayki, Tata Dios. 9 Ama noqamanta pakakuychu. Phiñakuspa, ama qhesachawaychu. Qanlla yanapawajniy kanki. Ama sapayta saqerpariwaychu, amataj kachariwaychu; Qanmin salvawaj Diosniy kanki. 10 Tatay mamay saqerpariwajtinkupis, Tata Diosqa jap'ikapuwanqa. 11 Tata Dios, ñanniykita rikuchiway, cheqan ñantataj pusaway, enemigosniyrayku. 12 Ama paykunaj munayninmanqa saqerpariwaychu, imaraykuchus contraypi sayaykunku llulla testigos, pikunachus maqanawankumanta wañurishanku, chaykuna. 13 Chaywampis yachanipuni Tata Diospa k'acha kayninta rikunayta kay kawsaypi. 14 Tata Diospi atienekuy; kallpachakuy, amataj q'enaqakuychu. Tata Diospipuni atienekuy.
