1 Tata Dios, tukuy sonqo, tukuy alma Qanman chimpamuyki. 2 Qampi atienekuni, Diosníy; ama saqewaychu p'enqaypi rikhurejta, nitaj saqeychu contrariosniyta atipawajta. 3 Qampi suyakojqa mana ujpis p'enqaypi rikhurenqachu. Astawanqa p'enqaypi rikhurichunku contraykipi qhasimanta oqharikojkuna. 4 Ñankunaykita rikuchiway, Tata Dios, purinasniykinejta pusaway. 5 Cheqan kayniykinejta pusaway, yachachiwaytaj. Qanmin kanki salvaj Diosniy. Tukuynin p'unchay Qampi suyakuni. 6 Yuyarikuy, Tata Dios, k'acha kayniykimanta, khuyakuyniykimantawan, imaraykuchus wiñaypaj kanku. 7 Wayna kashaspa juchallikusqasniymanta ama yuyarikuychu, nitaj contraykipi oqharikusqasniymantapis. Tata Dios, noqamanta yuyarikuy jatun munakuyniykiman jina, k'acha kayniykiman jinataj. 8 K'acha sonqo, cheqampunitaj Tata Diosqa; chayrayku juchasapasman cheqan ñanmanta yachachin. 9 Llamp'u sonqoyojkunata cheqan ñanman churan, jinallataj ñankunantapis paykunaman rikuchin. 10 Tata Diosqa tukuy imata ruwan khuyakuywan, cheqa kaywan ima, pikunachus Paywan trato ruwasqankuta, kamachisqasnintawan kasojkunawan. 11 Jatun sutiykirayku, Tata Dios, jatun juchayta pampachay. 12 Sichus pi runapis Diosta manchachikun chayqa, Diosqa chay runaman yachachenqa mayqen ñantachus ajllakunanta. 13 Chay runaqa allin kaypi kusikonqa, wawasnintaj jallp'ata herenciankupaj jap'enqanku. 14 Tata Diosqa Payta manchachikojkunamanta ni imata pakanchu; tratontapis paykunaman rejsichenqa. 15 Noqaj ñawisneyqa Tata Diosllapipuni kashan, imaraykuchus Payqa chakisniyta ch'ipamanta orqhowan. 16 Kutirikamuway, Tata Dios, khuyakuwaytaj, imaraykuchus sapallay kashani, phutiypitaj. 17 Sonqoyman llakiykuna yapakamuwan; kay phutiykunamanta orqhoway. 18 Llakiyniyoj kani, ni imanakuyta atispa. Qhawariway, juchasniytataj pampachay. 19 Rikuy mashkhachus enemigosniy kanku; chejnikuwaspa, mana rikuytapis atiwankuchu. 20 Kawsayniyta waqaychay, salvawaytaj ama p'enqachisqa kanaypaj, imaraykuchus Qampi atienekuni. 21 Allin kaywan, cheqan kaywan waqaychawachunku, imaraykuchus Qampi suyakuni, Tata Dios. 22 Tata Dios, tukuy phutiykunamanta Israel aylluykita libray.
