SALMOS 21

1Tata Dios, reyqa kusisqa kashan payta kallpachasqaykirayku. Kusisqallapuni kashan, imaraykuchus Qan payta yanaparqanki atipanampaj. 2Sonqompa munasqanta jaywanki, mañakusqantataj qonkipuni. 3Jatun bendicioneswan payta taripaj llojserqanki, qorimanta pillutataj umanman churarqanki. 4Kawsayta mañakusorqa, qorqankitaj ashkha watasta, wiñay kawsayta. 5Payta yanapasqaykirayku atiynenqa jatun. May allin jatumpaj qhawasqa kanantataj ruwarqanki. 6Wiñaypaj payta bendecerqanki. Paywan kaspa, kusiywan sonqonta junt'acherqanki. 7Chayrayku reyqa Tata Diospi atienekun; patapi kaj Diospa khuyakuyninrayku mana kuyuchisqachu kanqa. 8Atiyniyoj makiyki tukuy enemigosniykiman chayanqa; paña makiykeqa chejnisojkunata taripanqa. 9K'ajashaj hornota jina paykunata ruway, justiciata ruwanaykipaj rikhurimunki chaypacha. Chaypacha Tata Diosqa sinch'i phiñakuynimpi paykunata q'olaykuchenqa, ninawantaj chinkachenqa. 10Kay pacha runas ukhumanta wawasninkuta chinkachinki, mirayninkutawan. 11Sajrata ruwasuyta munaspa, contraykipi wakichikuspapis, mana imatapis ruwasuyta atenqankuchu. 12Qanmanta tukuyninku ayqerikaponqanku, paykunaj contrankupi flechasniykita kachaykunayajtiykikama. 13Atiyniykipi jatunchakuy, Tata Dios, noqaykutaj atiyniykimanta takispa, yupaychasqayku.

will be added

X\