1 Cieloqa Diospa atiyninmanta parlawanchej, tukuy Paypa ruwasqasninmantataj willawanchej. 2 Sapa p'unchay willallawanchejpuni, sapa ch'isitaj willallawanchejpuni. 3 Mana ima parlaypis kanchu, nitaj ima parlasqapis uyarikunchu. 4 Chaywampis chay willayqa tukuynejpi yachakun, kay pachaj k'uchusninkamataj chayan. Cielopi Diosqa intej tiyakunanta churarqa. 5 Intitaj ñanninta kusisqa puriyta qallarin, correj wayna jina, casamiento toldomanta novio llojsimun, ajinata. 6 Inteqa cieloj ujnin kantunmanta llojsimuspa, muyuykun ujnin kantunman chayanankama. Mana imapis k'ajayninmanta pakakuyta atinchu. 7 Tata Diospa yachachisqanqa mana pantayniyoj; watejmanta runata allin kawsayman churan. Tata Diospa kamachisqanqa cheqampuni; yachayniyojman tukuchin mana yachayniyojta. 8 Tata Diospa kamachisqasnenqa cheqampuni, sonqotataj kusichin. Tata Diospa kamachisqanqa ch'uwa, ñawimantaj k'anchayta qon. 9 Tata Diosta manchachikoyqa mana ch'ichiyoj, wiñaypajtaj sayan. Paypa nisqasnenqa pachallampuni, cheqataj. 10 Chayqa sumaj qorimantapis aswan munana; abeja misk'imantapis aswan misk'iraj kashan. 11 Chaykunanejta kamachiykeqa k'amisqa; chaykunata kasojqa jatun t'inkayoj kanqa. 12 Pitaj pantakusqanmanta reparakuyta atinmanri? Perdonaway, Tata Dios, pakaypi kaj pantakusqaymanta. 13 Wapuykachaspa juchallinamanta kamachiykita waqaychay. Ama saqeychu wapuykachay atipanawanta. Ajinamanta ni pej juchachanan kasaj, jatun juchamanta llimphuchasqa. 14 Pakakunay chhanka, kacharichiwaj Tata Dios, ñawpaqeykipi parlasqasniy yuyasqasniypis allin kachun.
